Տպել
Ծխելը տարեկան 1 տրլն դոլարի վնաս է հասցնում համաշխարհային տնտեսությանը: Այս եզրակացությունն է բովանդակում Առողջապահության համաշխարհային կազմակերպության (ԱՀԿ) և ԱՄՆ-ի Քաղցկեղի ազգային ինստիտուտի զեկույցը, որը հրապարակվել է հունվարի 10-ին:
Գրեթե 700 էջանոց ուսումնասիրությունը նվիրված է «ծխախոտի տնտեսությանը և ծխախոտի վերահսկողության տնտեսությանը»: Զեկույցի հեղինակները եկել են այն եզրակացությանը, որ «ծխախոտի արդյունաբերությունը և դրա արտադրանքի մահաբեր ներգործությունը տարեկան համաշխարհային տնտեսության վրա նստում է 1 տրլն դոլար՝ նկատի առնելով բուժման ծախսերը և աշխատանքի արտադրողականության կորուստները»:
Նշվում է, որ ծխախոտի գործածության հետևանքով ամեն տարի մահանում է վեց միլիոն մարդ: Նրանք հիմնականում զարգացող երկրների բնակիչներ են:
Ընդամենն աշխարհում կան 15 և ավելի բարձր տարիքի 1,1 մլրդ ծխողներ: Նրանցից շուրջ 226 միլիոնն ապրում է աղքատության մեջ: «Ծխախոտի գործածման գլոբալ բեռը հսկայական է, այն ավելի ու ավելի է ծանրանում միջին և ցածր եկամուտներ ունեցող երկրներում»,-նշվում է հետազոտության մեջ:
Փորձագետների գնահատումներով՝ սիգարետի յուրաքանչյուր տուփի հաշվով ընդամենը 0,8 դոլարով հարկերի ավելացումը պետություններին թույլ կտար տարեկան լրացուցիչ ստանալ 140 մլրդ դոլար: Դա կհանգեցներ աշխարհում միջինը 42 տոկոսով ծխախոտի արտադրանքի գների աճի և 66 միլիոն մարդով (9 տոկոսով) ծխողների թվի նվազման: Մասնագետները մատնանշում են, որ ծխախոտի արտադրանքի գների բարձրացումը կարող է զգալիորեն ավելացնել պետական եկամուտները՝ դրանք հետագայում առողջապահության և զարգացման կարիքների համար օգտագործելու նպատակով:
Զեկույցի հեղինակներն ընդգծում են, որ «ծխախոտի ընկերությունների շուկայական հզորությունը վերջին տարիներին աճել է»: 2014 թվականին հինգ խոշորագույն ընկերություններ վերահսկում էին սիգարետների համաշխարհային շուկայի 85 տոկոսը: Փորձագետները նշում են, որ դրանց ազդեցության սահմանափակմանն ուղղված քաղաքականությունը «խոստանում է բերել ծխախոտի գործածության նվազման», հաղորդել է ՏԱՍՍ գործակալությունը:
