Տպել
Կորոնավիրուսն անվտանգ է ուղեղի բջիջների համար, հավաստիացնում են գերմանացի եւ բելգիացի հետազոտողները։ Նրանց նոր հետազոտության արդյունքները հրապարակվել են Cell ամսագրում։
Հետազոտության հեղինակներն ուսումնասիրել են անոսմիան՝ հոտառության կորուստը, որը բժիշկները համարում են COVID-19-ի հիմնական ախտանշաններից մեկը։ Մասնագետներն ուսումնասիրել են 85 պացիենտի տվյալները, ներառյալ վարակվելուց մի քանի օր հետո մահացածներինը։
Պարզվել է, որ SARS-CoV-2-ով վարակման գլխավոր օբյեկտներ մարդու քթի խոռոչի հոտառական էպիթելներում դառնում են այսպես կոչված սուստենտակուլյար կամ պահող բջիջները։ Գիտնականները ապացույցներ չեն գտել, որ կորոնավիրուսն ախտահարում է հոտառության համար պատասխանատու սենսորային նեյրոնները։
Նրանց խոսքով՝ հոտառական սոխուկի պարենխիմատոզ հյուսվածքը նույնպես չի վնասվում։ Այսպիսով, մասնագետների խոսքով, SARS-CoV-2-ը նեյրոտրոպիկ վիրուսի տեսք չունի։
Այս հետազոտությունը հերքում է ավելի վաղ առաջ քաշված ենթադրությունները, թե վիրուսը ախտահարում է հոտառական լորձաթաղանթի նեյրոնները։
