Տպել
Մոսկվայի պատրիարքարանի արտաքին եկեղեցական կապերի բաժնի նախագահ միտրոպոլիտ Վոլոկոլամսկի Իլարիոնը (Ալֆեեւ) «Ռոսիա 24» հեռուստաալիքի «Եկեղեցին եւ աշխարհը» հաղորդաշարում պատմել է, որ պարբերաբար ֆիլմեր եւ սերիալներ է դիտում Netflix հարթակով։
«Ես ունեմ բաժանորդագրություն Netflix-ին, եւ երբ ազատ ժամանակ եմ ունենում, ես օգտվում եմ այդ ծառայությունից ֆիլմեր եւ սերիալներ դիտելու համար։ Տպավորվածներից «Երկու պապ» ֆիլմն է։ Ֆիլմը կաթոլիկ եկեղեցու հանդեպ մեծ հարգանքով է մատուցվել եւ գեղեցիկ նկարահանվել, ես այն հաճույքով եմ դիտել», – պատմել է հոգեւորականը։
Նա նաեւ կիսվել է Մեծ Բրիտանիայի թագավորական ընտանիքի մասին «Թագը» սերիալի տպավորություններով: Միտրոպոլիտի խոսքով՝ «շատ որակով նկարահանված» ժապավեն է եւ նրա մոտ առանձնակի հետաքրքրություն է առաջացրել այն պատճառով, որ ֆիլմում հայտնվող կերպարների մի մասին ինքն «անձամբ է ճանաչում»:
Միտրոպոլիտ Իլարիոնը մեկնաբանել է հարթակում ԼԳԲՏ բովանդակության առկայությունը՝ նշելով, որ այն իսկապես գոյություն ունի եւ հիմնականում երիտասարդական սերիալներում։ Մասնավորապես, նա հիշատակել է իսպանական «Էլիտան»։
Միտրոպոլիտի կարծիքով՝ անհրաժեշտ է նկարահանել քահանաների «իրական կյանքի» մասին, որի մասին քչերը գիտեն։ Նկարահանումների ժամանակ պետք է ամբողջովին հրաժարվել պատրիարքի եւ «պաշտոնական եկեղեցու» այլ դեմքերի վրա կենտրոնանալուց։
«Ես կարծում եմ, որ հետաքրքիր կլիներ սերիալ ստեղծել ռուս Ուղղափառ եկեղեցու կյանքի մասին, քանի որ իսկապես շատերի համար եկեղեցու կյանքը մնում է փակ եւ տաբուացված թեմա։ Շատերը նույնիսկ չգիտեն, թե ինչով են ապրում քահանաները, ինչով են նրանք զբաղվում», – նշել է միտրոպոլիտ Իլարիոնը։
