Տպել
Ղազախստանի վրա հարձակումների մասակից ահաբեկիչները հարձակվում էին դիահերձարանների վրա, գողանում դիակներ։ Այս մասին այսօր ՀԱՊԿ անդամ պետությունների ղեկավարների մասնակցությամբ անցկացվող հեռավար նիստում հայտարարեց Ղազախստանի նախագահ Կասիմ– Ժոմարտ Տոկաևը` ներկայացնելով երկրում իրավիճակն ու այն բնորոշելով իբրև ահաբեկչության ուղիղ սպառնալիք։
«Ուղիղ հայտարարում եմ միջազգային ահաբեկիչների, օտարերկրյա զինյալ վարձկանների մասնակցության մասին։ Պատահական չէ, որ ահաբեկիչները հարձակվում էին դիահեձարանների վրա, գողանում իրենց հանցակիցների դիակները։ Իրենց հանցակիցներին ռազմի դաշտից հեռացնելն ու այդկերպ հետքերը մաքրելը միջազգային ահաբեկիչների ուղիղ գործելաոճն է»,– ասաց Տոկաևը։
Վերլուծելով Ղազախստանում տեղի ունեցած իրադարձությունները` Տոկաևը հայտարարեց, որ այս տարվա սկզբից տեղի ունեցած բոլոր իրադարձությունները մեկ շղթայի օղակներն են` միտված միասնական ավերիչ մտահղացման իրագործմանը`պետական հեղաշրջման իրականացմանը։
Տոկաևը հայտնեց նաև, որ դրա համար փորձ է արվել օգտագործել երկրում առկա դժգոհությունը գազի գնի թանկացման պատճառով։ Արդյունքում առաջ են քաշվել սոցիալական ու քաղաքական պահանջներ։
Բայց անգամ գազի թանկացման չեղարկումից ու կառավարության հրաժարականից հետո իրավիճակը չհանդարտվեց, այլ հակառակը` ինչ-որ պահի դարձավ կրիտիկական։
Ղազախստանի նախկին մայրաքաղաքն ու 9 շրջանները ինչ-որ պահի ավազակների ձեռքում հայտնվեցին։
Նրանք առանձնակի դաժանությամբ ծեծի էին ենթարկում ոստիկաններին, կտրել են նրանցից երկուսի գլուխները։ Ընդհանուր առմամբ զոհվել է անվտանգության 16 աշխատակից, ավելի քան 1,3 հազարը վիրավորվել են։ Զոհեր կան նաև խաղաղ բնակչության շրջանում, հստակ թիվը ճշտվում է։
Տոկաևի խոսքով՝ ահաբեկիչները ծրագրել էին գրավել նաև նախագահական նստավայրը, սակայն ՀԱՊԿ խաղաղապահներ ուղարկելու մասին հաղորդումներից հետո հրաժարվել են այդ պլանից։
Թե որքան ժամանակ է տևել այս ահաբեկչական գործողությունների պլանավորումը` մեկ, երկու թե երեք տարի, ըստ Ղազախստանի նախագահի` ցույց կտա քննությունը։
Տոկաևը հայտնեց, որ մոտ ժամանակներս Ղազախստանի իշխանությունները համաշխարհային հանրությանը կներկայացնեն Ղազախստանում ահաբեկչության կազմակերպման ապացույցներ։
Խոսելով իրադարձությունների հետաքննության մասին՝ Տոկաևն ասաց, որ ներկայում ոստիկանություն է բերման ենթարկվել մոտ 8 հազար մարդ, առգրավվել է 116 զենք։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ-Ժոմարտ Տոկաևը երկրում երկշաբաթյա արտակարգ դրություն է մտցրել։ Նա օգնության համար դիմել է Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ է ուղարկել Ղազախստան, որոնց թվում 100 զինծառայող կա Հայաստանից։
