Տպել
ՀՀ ազգային ժողովի տնտեսական հարցերի մշտական հանձնաժողովը հավանություն տվեց կառավարության ներկայացրած օրենքի նախագծին, որով առաջարկվում է սահմանել, որ կաթնային յուղի փոխարինիչով կաթնամթերքը խանութներում առանձնացված դարակաշարում լինի:
«Առեւտրի եւ ծառայությունների մասին» Հայաստանի Հանրապետության օրենքում լրացումներ կատարելու մասին և կից ներկայացված օրենքների նախագծերի փաթեթն ԱԺ հանձնաժողովի նիստում ներկայացրեց ՀՀ էկոնոմիկայի նախարար Վահան Քերոբյանը՝ սկզբնապես ներկայացված նախագծում որոշ փոփոխությունների առաջարկով:
Նախարարությունն առաջարկում է խանութներում կաթնամթերքի վաճառքի համար որոշակի կարգավորումներ մտցնել:
«Արմենպրես»-ի հաղորդմամբ՝ Հանձնաժողովի անդամ Բաբկեն Թունյանը պարզաբանեց. «Մասնավորապես, քանի որ կա կաթնամթերք, որը պատրաստված է բնական, մաքուր կաթից, և կա կաթնամթերք, որի պատրաստման համար բուսական յուղ կամ այլ հավելանյութեր են օգտագործվում, և սպառողը հաճախ ընկնում է մոլորության մեջ, առաջարկվում է, որ խանութներում դրանք դասավորվեն առանձին դարակաշարերում, որ անմիջապես տեսանելի լինի, թե որն է արհեստական հավելումներով, բուսական յուղերով, որը՝ լրիվ մաքուր, բնական»:
Սկզբնապես կազմված նախագծում այս կարգավորումը վերաբերելու էր բոլոր խանութներին, սակայն, հետո նկատի են ունեցել, որ դա փոքր խանութների դեպքում հնարավոր չէ: Այսպիսով, առաջարկվեց կարգավորումը տարածել միայն 200 քմ-ն գերազանցող մակերես ունեցող խանութների վրա:
Առեւտրի օբյեկտներում կաթնային յուղի (կաթնային ճարպի) փոխարինիչով կաթնամթերքը պետք է ապահովված լինի առանձնացված սպառողական դարակաշարով և «Պարունակում է կաթնային յուղի փոխարինիչ» հատուկ տեսակի նշումով՝ ընթեռնելի եւ տեղադրված տեսանելի վայրում:
Նախագիծը հանձնաժողովի նիստում հավանություն ստացավ փոփոխությամբ հանդերձ:
