Տպել
Անթալիայում 29 տարվա մեջ առաջին անգամ ձյուն է տեղացել, հայտնում է Tass-ը, հղում անելով Hurriyet թերթին։
Վատ եղանակից ամենաշատը տուժել է Ստամբուլը։ Երեքշաբթի օրն իշխանությունները ստիպված են եղել բնակիչներին արգելել օգտվել անձնական տրանսպորտային միջոցներից մինչև ժամը 13:00-ն, իսկ տեղական օդանավակայանում բոլոր թռիչքները նույնպես դադարեցվել են մինչև այդ ժամը: Մարմարա ծովի մի քանի հատվածներում միջինում արդեն տեղացել է մինչև 50-60 սմ ձյուն։ Տեղումներ են եղել նաև կենտրոնական որոշ նահանգներում և երկրի հարավում։
Նախօրեին կառավարության արտակարգ իրավիճակների վարչությունը նաև խորհուրդ էր տվել բոլոր մարզերի բնակիչներին, որտեղ ձյան տեղումները շարունակվում են, մնալ տանը և հնարավորության դեպքում դուրս չգալ փողոց։ Օդերևութաբանները կանխատեսում են, որ Ստամբուլում տեղումները կշարունակվեն մինչև ուրբաթ, դրանց ինտենսիվությունը կնվազի չորեքշաբթի։ Այժմ հանրապետական նշանակության մի շարք ավտոճանապարհներին թե՛ մեծ քանակությամբ ձյան, թե՛ վթարների հետևանքով խցանումներ և կուտակումներ են գոյացել։
Անկարայի և Ստամբուլի միջև մայրուղին, ինչպես նաև դեպի Ստամբուլի օդանավակայան մուտքի ճանապարհները մի քանի ժամով արգելափակվել են։
