Տպել
ArmLur.am-ի իշխանությանը մոտ կանգնած աղբյուրները փոխանցում են, որ ԱԺ «Քաղաքացիական պայմանագիր» խմբակցության ներսում արդեն քանի օր է` թեժ «մարտեր» են ընթանում:
Բանն այն է, որ ՔՊ-ի մեծամասնությունը տեղյակ չի եղել, որ ՀՀ վարչապետ Նիկոլ Փաշինյանը նպատակ ունի ՀՀ կառավարության աշխատակազմի ղեկավար, ՀՀ ԿԳՄՍ նախկին նախարար Արայիկ Հարությունյանին ՀՀ նախագահ «դարձնել»: Եվ հիմա բոլորը շոկի մեջ են ու պայքարում են, որ վարչապետը հետ կանգնի իր որոշումից:
Ի դեպ, ըստ ArmLur.am-ի տեղեկությունների, Նիկոլ Փաշինյանը վաղուց է նման որոշում ունեցել, անգամ պլաններ են ունեցել ՀՀ նախագահ Արմեն Սարգսյանի դեմ իմպիչմենտի գործընթաց սկսել ու արդեն Արայիկ Հարությունյանին նախագահ «կարգել», սակայն Սարգսյանն իր հրաժարականով պրոցեսն արագացրել է:
Իշխանության մեր աղբյուրները նշում են, որ հատկապես, երբ ՔՊ-ականները տեսել են, թե սոցիալական ցանցերում ինչպիսի վատ արձագանք եղավ Հարությունյանի՝ նախագահի թեկնածության հետ կապված, իրենց ներքին օնլայն «չաթերում» ՔՊ-ականները ելքեր են փնտրում այդ հարցը օրակարգից հանելու համար: Անգամ իրենց «ներքին» շփումներում ՔՊ-ականները շատ վատ բնութագրումներ են տալիս Արայիկ Հարությունյանին, հայտարարում, որ նա տապալեց կրթական համակարգի բոլոր ծրագրերը, կառավարությունում ու թիմում գրեթե բոլորի հետ թշնամական հարաբերություններ ունի, ու այսքանից հետո նրան նախագահ դարձնելը անմտություն է: Բայց, թե որքանով ՔՊ-ականներին կհաջողվի իրենց ըմբոստությունը հասցնել վարչապետին, որ հետ կկանգնի իր որոշումից, դժվար է ասել:
ՔՊ-ականները նպատակ ունեին օնլայն վեճերը տեղափոել Դիլիջան` փակ քննարկումների ժամանակ ինչ-որ բան փոխելու համար, սակայն դա էլ չստացվեց` խմբակցության մեծամասնությունը կորոնավիրուսով է վարակվել` ՀՀ վարչապետի գլխավորությամբ: Հիմա ՔՊ-ականները շունչները պահած սպասում են Նիկոլ Փաշինյանի առողջացմանը, որպեսզի փորձեն նրա հետ նախագահի այլ թեկնածու փնտրել:
Ի դեպ, ՔՊ-ականները դեմ են Հարությունյանին, բայց նաև թեկնածու չունեն, որ առաջարկեն վարչապետին:
