Տպել
ՀՀ ԱԺ աշխատանքի և սոցիալական հարցերի մշտական հանձնաժողովը փետրվարի 7-ի նիստում քննարկել է ԱԺ «Հայաստան» խմբակցության պատգամավոր Աղվան Վարդանյանի հեղինակած «Նվազագույն ամսական աշխատավարձի մասին» ՀՀ օրենքում փոփոխություն կատարելու նախագիծը։
Դրանով ընդդիմադիր պատգմավորն առաջարկում էր նվազագույն ամսական աշխատավարձը գործող 68 000 դրամի փոխարեն սահմանել 100 000 դրամ։
Աղվան Վարդանյանը հայտնել է, որ նախագծի հիմքում նվազագույն սպառողական զամբյուղի հաշվարկն է, որը 2021թ-ին կազմել է 70.000 դրամ:
ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը, ներկայացնելով հարցի շուրջ ՀՀ կառավարության տեսակետը, ասել է, որ գործադրի 2021-2026 թթ. ծրագրի համաձայն մինչև 2026 թվականը քայլեր են ձեռնարկելու նվազագույն աշխատավարձը 85.000 դրամ սահմանելու ուղղությամբ:
Ռուբեն Սարգսյանը նաև նշել է, որ նախագծի ընդունման դեպքում ՀՀ-ում նվազագույն աշխատավարձը կկազմի միջին աշխատավարձի մոտ 50%-ը, ինչը, ըստ նրա, բավական բարձր է և կարող է հակառակ ազդեցություն ունենալ տնտեսական զարգացման վրա:
Ուստի, կառավարությունն առաջարկում է նվազագույն աշխատավարձն այս պահին թողնել անփոփոխ։
Քվեարկության արդյունքում հանձնաժողովը բացասական եզրակացություն է տվել նախագծին:
