Տպել
«Քաղաքացիական պայմանագիր» խմբակցության պատգամավոր Արսեն Թորոսյանն այսօր ՀՀ նախագահի ընտրության հարցի քննարկման ժամանակ հարց ուղղեց նախագահի թեկնածու Վահագն Խաչատուրյանին՝ արդյո՞ք նա պատրաստվում է լինել միայն քաղաքական մեծամասնության, թե ՀՀ բոլոր քաղաքացիների նախագահը:
Վահագն Խաչատուրյանն էլ վստահեցրեց, որ ընտրվելու դեպքում լինելու է բոլոր քաղաքացիների նախագահը.
«Ես համոզված եմ, որ դուք չեք ուզում, որ լինեմ միայն ձեր նախագահը, դուք էլ համոզված եղեք, որ ես չեմ ուզում լինել միայն ձեր նախագահը: Ես Սահմանադրությամբ պարտավոր եմ լինել ՀՀ բոլոր քաղաքացիների նախագահը»,- պատասխանեց Խաչատուրյանը:
Նախագահի թեկնածուն ընդգծեց, որ Հանրապետության նախագահի ինստիտուտն ուղղված է համազգային խնդիրների լուծմանը, ինքն էլ ընտրվելու դեպքում պատրաստվում է հենց այդպես էլ վարվել:
«Միգուցե, նաև իմ թեկնածությունը դրել եք՝ հաշվի առնելով այդ հանգամանքը: Իմ մեջ տեսել եք այն մարդուն, որը կարող է այդ դերը կատարել: Այսօրվա մեր մասնատված, ծանր սոցիալ-տնտեսական վիճակում գտնվող հասարակության համար շատ կարևոր է, որ նախագահի ինստիտուտը համախմբող լինի», – ասաց Վահագբ Խաչատուրյանը:
Ըստ նրա՝ նախագահի ինստիտուտը միայնակ չի կարող լավ աշխատել, խնդիրները լուծել, եթե չկա Ազգային ժողովի, կառավարության, հասարակության, ՀԿ-ների հետ համագործակցություն:
«Այստեղ իմ ու քո լինել չի կարող, ես այդպես եմ ընկալում և այդ ընկալմամբ էլ ձեր առջև եմ հանդես գալիս», – ասաց նա:
