Տպել
Սեդարս-Սինայի բժշկական կենտրոնի գիտնականները հայտնաբերել են գեն, որը կարեւոր դեր է խաղում մարդու բնածին իմունային համակարգում: Այս գենը՝ NLRP11-ը, օգնում է ակտիվացնել բորբոքային արձագանքը, որը թույլ է տալիս մարմնի սպիտակ արյան բջիջներին հարձակվել օտարածին ներկայության դեմ:
Հետազոտության արդյունքները, որոնք հրապարակվել են Nature Immunology ամսագրում, բժշկական գիտությունն ավելի մոտեցրել են կենսաբանական գործընթացի ըմբռնմանը, որը կարող է ինչպես օգնել, այնպես էլ վնասել օրգանիզմին:
«Քրոնիկ բորբոքումը մարդկային անթիվ հիվանդությունների հիմնական պատճառն է»,- ասել է հետազոտության համահեղինակ, Սեդարս-Սինայի բժշկական կենտրոնի պաթոլոգիական հետազոտությունների բաժնի տնօրեն Քրիստիան Ստեհլիկը: «Եթե ուսումնասիրեք մոլեկուլային մեխանիզմները, որոնք կապված են այն բանի հետ, թե ինչպես է առաջանում բորբոքումը եւ ինչպես է այն կարգավորվում, դուք կգտնեք մի բան, որը կարող է շատ լայնորեն կիրառվել»:
Երբ իմունային համակարգը զգում է բակտերիաների, վիրուսների, տոքսինների կամ այլ օտարածին մարմնի առկայությունը, այն ուղարկում է արյան սպիտակ բջիջներ՝ շրջապատելու անցանկալի նյութը եւ քիմիական նյութեր է արձակում՝ հարձակվելու համար: Այս ռեակցիան հանգեցնում է բորբոքման, որն առաջացնում է կարմրություն, ցավ, ջերմություն եւ այտուց տուժած հատվածում, մինչ մարմինն ինքն իրեն բուժում է: Երբեմն այս պաշտպանական ռեակցիան սպասվածից երկար է տեւում, ինչը հանգեցնում է քրոնիկ բորբոքման: Կամ՝ իմունային համակարգը կարող է սխալմամբ հարձակվել առողջ բջիջների վրա՝ հանգեցնելով աուտոիմուն հիվանդության:
Բորբոքային արձագանքը վերահսկելու եւ քրոնիկ բորբոքումը կանխելու բանալին կարող է ընկած լինել NLRP11 գենի արտահայտման վրա ազդելու ունակության մեջ:
Գիտնականներն օգտագործել են գեների խմբագրման համակարգ՝ գեները հեռացնելու կամ մարդու սպիտակ արյան բջիջներում գենային մուտացիաներ ներմուծելու համար, որոնք կոչվում են մակրոֆագներ: Նրանք նկատել են, որ NLRP11 գենի ջնջումը խոչընդոտել է իմունային համակարգի NLRP3 կոչվող սենսորի ակտիվացմանը եւ բորբոքային արձագանքի առաջացմանը։
