Տպել
Երեկ «Ուժը հայրենյաց» կուսակցության նախագահ Տիգրան Արզաքանցյանի կինը, նախկին պատգամավոր Նատալյա Ռոտենբերգն իր ֆեյսբուքյան էջում ֆոտոշարք էր հրապարակել՝ արված Երևանի մետրոպոլիտենում։ Հաշվի առնելով, որ մետրոպոլիտենը համարվում է ռազմավարական նշանակության օբյեկտ, և այնտեղ նկարահանումներն արգելված են, ֆոտոշարքի հրապարակումը դժգոհության և քննարկման առիթ էր տվել հայ օգտատերերին։ Հայտնի է, որ անգամ լրագրողներին հաճախ չեն թույլատրում մետրոյում տեսագրություն անել։ Մենք խնդրեցինք մետրոպոլիտենի ադմինիստրացիային մեկնաբանություն տալ սրա առիթով։
«Նատալյա Ռոտենբերգը դիմում է ներկայացրել Կարեն Դեմիրճյանի անվան Երևանի մետրոպոլիտենի տնօրենին՝ լուսանկարահանում իրականացնելու նպատակով։ Տիկին Ռոտենբերգը մետրոպոլիտենի տարածք է մտել որպես սովորական ուղևոր, գնել է ժետոնը և «Բարեկամություն» կայարանից ուղևորվել է դեպի «Երիտասարդական» կայարան։ Նկարահանումը սիրողական բնույթի է եղել։ Նրա օգնականը մեզ տեղեկացրեց, որ տիկին Ռոտենբերգը մոտ 2 տարի, բնակվելով Երևանում՝ երբևիցե չի այցելել Երևանի մետրոպոլիտեն: Նա ցանկացել է այցելել և համեմատականներ անցկացնել Մոսկվայի մետրոպոլիտենի հետ ու որպես հուշ ունենալ մետրոպոլիտենում լուսանկար։ Իմանալով, որ մետրոպոլիտենում լուսատեսանկարահանում՝ առանց տնօրինության թույլատրության, չի իրականացվում, Ռոտենբերգը տնօրինությանը հավուր պատշաճի ներկայացրել է իր դիմումը։ Ստացել է տնօրենի թույլատրությունը»,- մեզ ասաց Երևանի Կարեն Դեմիրճյանի անվան մետրոպոլիտենի մամուլի խոսնակ Տաթև Խաչատրյանը։
Մեր այն հարցին, թե յուրաքանչյուր քաղաքացի կարո՞ղ է դիմել Երևանի մետրոպոլիտենի տնօրինությանը՝ լուսատեսանկարահանում իրականացնելու համար, մետրոպոլիտենի խոսնակն ասաց, որ՝ այո, կարող է և հավելեց, որ այդ դիմումը տնօրենը մակագրում է համապատասխան բաժինների ներկայացուցիչներին, ովքեր էլ հավուր պատշաճի իրականացնում են իրենց աշխատանքը։
