Տպել
Արքայազն Չարլզը, կարծես, լուրջ անախորժություններ ունի։ Վերջերս լրատվամիջոցները գրում էին, որ արքայական ընտանիքի անդամի բարեգործական հիմնադրամը գումարներ է ընդունում կասկածելի անձանցից։ Նախօրեին The Times-ը հայտնել է, որ կազմակերպությունը 1 միլիոն ֆունտ ստեռլինգ է ստացել «Ալ Քաիդա» ահաբեկչական կազմակերպության նախկին առաջնորդ Ուսամա բեն Լադենի ազգականից։
Աղբյուրը հայտնում է, որ 2013 թվականին արքայազնը Լոնդոնի իր նստավայրում՝ Քլարենս Հաուսում, անձամբ հանդիպել է գործարար Բաքր բեն Լադենի հետ, որը գլխավորում էր «Binladin» խոշոր շինարարական կոնգլոմերատը։ Արքայազն Չարլզի խորհրդականները նրան հորդորել են հրաժարվել Ուսամա բեն Լադենի խորթ եղբոր նվիրատվություններից, սակայն Եղիսաբեթ II թագուհու ավագ որդին չի հետեւել նրանց խորհուրդներին։
Որոշ աշխատակիցներ կարծում էին, որ այդ համագործակցությունը կարող է բացասաբար ազդել թագավորական ընտանիքի հեղինակության վրա, սակայն արքայազն Չարլզն այլ դիրքորոշում ուներ։ Նրան թվում էր, թե Բաքր բեն Լադենին գումար վերադարձնելը ամոթալի քայլ կլինի։
Արքայազն Չարլզի բարեգործական հիմնադրամի ղեկավար Իեն Չեշիրը հայտարարել է, որ բեն Լադենի ընտանիքից նվիրատվություններ ստանալու համաձայնությունը լիովին հավանության է արժանացել մի քանի մարդկանց կողմից, այդ թվում՝ ֆինանսիստ Ամելիա Ֆոսեթի, BT հեռահաղորդակցության ընկերության տնօրենների խորհրդի նախկին նախագահ Մայքլ Ռեյկի, «Barclays» բանկի նախկին ղեկավար Ջոն Վարլիի կողմից։ Միեւնույն ժամանակ, պարբերականի հաղորդմամբ, Վարլին այս թեմայի քննարկման ժամանակ բացահայտորեն մատնանշել է իր անհանգստությունը Բաքր բեն Լադենից բարեգործական նվիրատվություններ ընդունելու պատրաստակամության վերաբերյալ։
Աղբյուրը՝ Peopletalk
