Տպել
Նյու Յորքի նահանգի իշխանություններն արտակարգ դրություն են հայտարարել նահանգում պոլիոմիելիտի բռնկման առիթով, որտեղ հաստատվել է հիվանդության մեկ դեպք, դեռեւս ապրիլին վերցված հոսող ջրերի տասնյակ փորձանմուշները վիրուսի դրական արդյունք են ցույց տվել, տեղեկացրել է Daily Mail-ը։
Այս մասին ուրբաթ հայտարարել է նահանգապետ Քեթի Հոչուլի աշխատակազմը։ Նահանգապետի աշխատակազմը տեղեկացրել է, որ այս քայլը թույլ կտա «նահանգի գործակալություններին ձեռնարկել համապատասխան միջոցներ տեղական իշխանություններին եւ մասնավոր անձանց օգնություն ցուցաբերելու համար՝ արտակարգ դրությանը պատրաստվելու, արձագանքելու եւ դրանից հետո վերականգնվելու համար»։
Վիրուսով հիվանդանալու դեպքն առաջին անգամ հայտնաբերվել է Ռոքլենդ օկրուգում՝ Նյու Յորքի Բրոնքս շրջանից ոչ հեռու, հուլիսի 21-ին։ Հոսող ջրերի վերահսկման համակարգը նույնպես վիրուս է հայտնաբերել հենց քաղաքում եւ մերձակա Օրանջ եւ Սալիվան օկրուգներում։ Ուրբաթ օրը պաշտոնական անձինք հայտարարել են, որ Նասաու օկրուգը, որը նույնպես գտնվում է Նյու Յորքից ոչ հեռու, իր հոսող ջրերում վիրուս է հայտնաբերել։
Օգոստոսին ԱՄՆ հիվանդությունների վերահսկման եւ կանխարգելման կենտրոնները տեղեկացրել էին, որ հետագա քննության ընթացքում Նյու Յորքում հայտնաբերվել է վիրուսի առնվազն 21 դրական նմուշ։ Նմուշներից մեկը ստացվել է ապրիլին, ինչը նշանակում է, որ կործանարար վիրուսը մինչեւ հայտնաբերվելը կարող էր շրջանառել մի քանի ամիս։
Անցած ամիս Ռոքլենդ օկրուգի մի պաշտոնյա նախազգուշացրել էր, որ չնայած ներկա պահին հայտնաբերվել է հիվանդության միայն մեկ դեպք, Նյու Յորքի վարակված բնակիչների իրական թիվը կարող է հասնել հազարների։
Հիվանդությունների վերահսկման եւ կանխարգելման կենտրոնի տվյալներով՝ պոլիոմիելիտով վարակման 1 900 դեպքից միայն մեկը չպատվաստված մարդկանց մոտ կարող է հանգեցնել կաթվածահարման։ Պաշտոնյաները հավաստիացնում են, որ պատվաստվածներն անհանգստանալու առիթ չունեն այս բռնկման հետ կապված։
Ամերիկացիների ավելի քան 90 տոկոսը պատվաստվում է երկու տարեկանում, եւ շատերը պետք է պատվաստված լինեն պետական դպրոց հաճախելու համար։ Պոլիոմիելիտի դեմ պատվաստումներ չկան. պատվաստումը մանուկ հասակում պաշտպանություն է ապահովում ամբողջ կյանքի համար։
