ԼԳԲՏ անձանց չի կարելի բռնության ենթարկել, իմ մոտեցումը դա է. hraparak.am

Սեպտեմբերի 3-ին «Իրավունքի կողմ» իրավապաշտպան ՀԿ-ն Երևանում նոր գրասենյակ բացեց ԼԳԲՏ համայնքի համար։ Տարածված հաղորդագրության մեջ նշվում է, որ Գրասենյակի բացման արարողությանը ներկա է եղել նաև Հայաստանում Շվեդիայի դեսպան Պատրիկ Սվենսոնը, ինչպես նաև Հայաստանի մարդու իրավունքների պաշտպան Քրիստիննե Գրիգորյանը` ի նշան նախաձեռնության աջակցության։ Այն, որ Պաշտպան Քրիստիննե Գրիգորյանը հատուկ սեր և հոգածություն է դրսեւորում սեռափոխված կամ այլ սեքսուալ կողմնորոշումներ ունեցող անձանց նկատմամբ, այդ մասին շատ է գրվել կամ խոսվել։

Մեզ հետ զրույցում էլ տիկին Գրիգորյանը չթաքցրեց իր հատուկ վերաբերմունքը սեռական փոքրամասնությունների նկատմամբ, ավելին` զրույցի կեսից նա սկսեց բավականին խիստ տոնայնությամբ պատասխանել մեր հարցերին՝ դրանով չթաքցնելով իր հովանավարչությունն ու հոգատարությունը այս «խավի» ներկայացուցիչների եւ նեգատիվ վերաբերմունքը` նման հարցեր տվողների նկատմամբ։

Մեր հարցին, թե ինչո՞ւ է որոշել, որ կարելի է ԼԳԲՏ համայնքին աջակցություն հայտնել նրանց գրասենյակի բացումն իր ներկայությամբ պատվելով, Քրիստիննե Գրիգորյանն ասաց․ «Որովհետև ես Մարդու իրավունքների պաշտպանն եմ, իսկ Հայաստանում մարդու իրավունքները համընդհանուր են, Սահմանադրությամբ են երաշխավորված, և ենթադրում են բոլոր խոցելի խմբերի պաշտպանություն։ Միջոցառումը եղել է նվիրված այդ համայնքի անձանց համար ապահով տարածքի, գրասենյակի բացմանը, որին մասնակցել եմ հանրային առումով, և էս առումով բացատրություններ ներկայացնելու կարիքը չեմ տեսնում։ Ակնհյատ է, որ ԼԳԲՏ անձինք ենթարկվում են կոնկրետ հետապնդումների»,-ասաց նա։

-Ինչպե՞ս։

-Կոնկրետ գործեր ունենք, որ նրանց նկատմամբ բռնություններ են եղել և այլն։

-Բայց մենք դեպքեր էլ ունենք, երբ ԼԳԲՏ անձինք են բռնությունների ենթարկել նորմալ օրիենտացիա ունեցող քաղաքացիներին։

-Ինձ թվում է՝ Ձեր հարցին Դուք ակնկալում եք, որ ես պատասխանեմ, ՋՁր մեկնաբանությունը, վստահ եմ, որ Դուք հոդվածում կգրեք։

-Ես ընդամենը հիշեցնում եմ։

-Ես փայլուն հիշում եմ, ես էդ մասին նաև խոսել եմ Ազգային ժողովում՝ տարեկան զեկույցի ներկայացման ընթացքում, և, էս առումով, որևէ խոցելի խումբ չի կարող դուրս մնալ մարդու իրավունքների՝ Սահմանադրությամբ երաշխավորված պաշտպանության շրջանակից։

-Պարզապես, եւ Ձեր կողմից հատուկ վերաբերմունք կա այդ շրջանակի հանդեպ, եւ այս կառավարության կողմից։

-Ես էսպես եմ ասում՝ ինձ համար դատապարտելի է, որ որևէ երկրում մարդու իրավունքների պաշտպանության մանդատ ունեցող պաշտոնատար անձը աչք կարող է փակել այն խախտումների վրա, որոնք որ տեղի են ունենում նաև այդ խմբի անձանց մասով։

-Այսինքն, Դուք նորմա՞լ եք գնահատում դա, որ կան ԼԳԲՏ անձինք, որոնք այլ սեռական կողմնորոշում ունեն․․․

-Որոնց չի կարելի բռնության ենթարկել։ Իմ մոտեցումը դա է։

-Բռնությանը ես էլ կողմ չեմ, բայց պրոպագանդա է, կարծես, տեղի ունենում, այդ թվում նաև ձեր մանսակցությամբ նրանց միջոցառումներին։

-Ես, եթե որևէ միջոցառման եմ մասնակցում՝ խոսելով կանանց իրավունքների մասին, ես դա չեմ հմարում պրոպագանդա, այլ դա համարում եմ խնդիրների ներկայացում։ Նույնը վերաբերում է այս միջոցառմանը, և պետք է դրան հանգիստ վերաբերվել, որովհետև մեր Սահմանադրությամբ երաշխավորված պաշտպանությունը երաշխավորված է բոլորի համար։

-Իսկ Ձեզ համար հաճելի՞ է շփվել ԼԳԲՏ անձանց հետ։

-Ինձ համար ՀՀ յուրաքանչյուր քաղաքացու և անձի հետ շփվելը իմ պարտականություններից է բխում, և ես որևէ մեկի հետ շփվելու տհաճություն չունեմ։

-Իսկ իրենք ավելի՞ շատ իրավունքներ ունեն, քան մյուս քաղաքացիները։

-Ոչ, ինձ թվում է՝ պետք չի մանիպուլացնել, Դուք մանիպուլյացիա եք անում, մոտեցում եք դրսևորում։ Իրենք ավելի շատ չունեն, բոլոր անձինք ունեն հավասար իրավունքներ։

-Բայց այդ մարդիկ մտել էին ոստիկանություն` ոստիկանների էին ծեծել, նման բան Հայաստանի պատմության մեջ չէր եղել, բայց ձեր կառավարության օրոք եղավ։

-Մեր կառավարությունը․․․ Խնդրում եմ՝ Ձեր բառերին, գնահատականներ տալուց ուշադիր եղեք, ես ՀՀ մարդու իրավունքների պաշտպանն եմ, և ոչ թե կառավարության անդամ եմ։ Ոստիկանության նկատմամբ բռնություններ գործադրվել են նաև որոշակիորեն տարբեր ցույցերի ընթացքում, դրանք նույնպես պետք է գնահատման առարկա դառնան, ինչպես այն դեպքերը, որոնք որ վերաբերում են Ձեր կողմից նշված դեպքին։

-Ցուցարարների՞ կողմից նկատի ունեք։

-Ցուցարարների, տարբեր հարբած վարորդների կողմից են լինում բռնություններ, դրանք բոլորը պետք է քննության առարկա դառնան։

-Բայց նրանք ԼԲԳՏ անձինք չեն եղել։

-Խոսքը վերաբերում է բռնությա՞նը, թե՞ խոսքը վերաբերում է անձանց սեռական կողմնորոշումներին։

-Խոսքը վերաբերում է նրան, որ Հայաստանում երբեք չէր եղել, որ այդ անձինք մտնեին ոստիկանություն ու ոստիկաններին բռնության ենթարկեին։

-Դե, ուրեմն պետք էր քրեական հետապնդում սկսել, և որը սկսվել է այդ անձանց նկատմամբ։

-Իսկ պատժվե՞լ են։

-Ես հետևություններ չունեմ՝ էս պահի դրությամբ դատարանի վճիռ կա՞, թե՞ չկա, բայց քրեական գործ կա հարուցված։

hraparak.am