Քորթնի Քարդաշյանը գնել է հայտնի հաղորդավարի տունը

Գործարար և հեռուստաաստղ Քիմ Քարդաշյանի քույրը՝ ձեռնարկատեր և դերասանուհի Քորթնի Քարդաշյանը ամուսնու՝ Blink-182 ռոք խմբի թմբկահար Թրևիս Բարքերի հետ միասին գնել է ԱՄՆ-ում հայտնի հաղորդավար Կոնան Օ’Բրայենի առանձնատունը, հաղորդում է Dirt-ը։

Նախկինում երբեք միասին չապրած ամուսինների նոր տունը գտնվում է Կալիֆորնիայի Կարպինտերիա քաղաքում։ Գործարքը կազմել է 14,5 մլն դոլար։

Նախորդ սեփականատերը՝ Օ’Բրայենը, վերանորոգել է 1957 թվականին կառուցված տունը: 199 քմ մակերեսով առանձնատունն ունի չորս ննջասենյակ, երեք լոգասենյակ և լրացուցիչ սանհանգույց, ինչպես նաև խոհանոց, հյուրասենյակ և մառան։ Նշվում է, որ պատերը ապակուց են։ Հյուրասենյակից հասանելի է մեծ պատշգամբ, որը հարմար է ճաշելու համար, իսկ ննջասենյակներից՝ դեպի օվկիանոս նայող պատշգամբներ։

0,16 հա տարածքում կա երկհարկանի հյուրատուն՝ երկու ննջասենյակով, հյուրասենյակով և փոքրիկ խոհանոցով, երկու մեքենայի համար նախատեսված ավտոտնակ՝ էլեկտրական մեքենաների լիցքավորման կայանով։ Քարդաշյանի և Բարքերի նոր հարևաններն են դերասաններ Էշթոն Քաթչերը և Միլա Կունիսը, ինչպես նաև ռեժիսոր Ջորջ Լուկասը։