Տպել
Վերջերս հայտնաբերված «պոտենցիալ վտանգավոր» աստերոիդը, որի չափը կազմում է մոտ 700 մ, նոյեմբերի 1-ին կանցնի Երկրի կողքով, հայտնում է NASA-ն:
2022 RM4 աստերոիդը՝ 330×740 մ տրամագծով և 828 մ բարձրությամբ, կանցնի մեր մոլորակի կողքով մոտ 84500 կմ/ժ արագությամբ, ինչը մոտ 68 անգամ գերազանցում է ձայնի արագությունը։
Նոյեմբերի 1-ին աստերոիդը կմոտենա Երկրին՝ մոտ 2,3 միլիոն կմ, ինչը վեց անգամ գերազանցում է Լուսնի միջին հեռավորությունը: NASA-ն 193 միլիոն կմ հեռավորության վրա Երկրին մոտեցող ցանկացած տիեզերական օբյեկտ անվանում է «Երկրի մերձակայքում գտնվող օբյեկտ» և սահմանում է 7,5 միլիոն կմ հեռավորության վրա գտնվող ցանկացած մեծ մարմին՝ որպես «պոտենցիալ վտանգավոր»:
Նման մարմին հայտնաբերելուց հետո աստղագետները ուշադիր դիտում են այն՝ փնտրելով կանխատեսված հետագծից շեղման որևէ նշան: ՆԱՍԱ-ն հետևում է մոտավորապես 28000 աստերոիդների գտնվելուն ու ուղեծրերին՝ Երկրի վրա ազդեցության ազդանշանային համակարգի (ATLAS) միջոցով, որը չորս աստղադիտակներից բաղկացած զանգված է, որը կարող է 24 ժամը մեկ կատարել ամբողջ գիշերային երկնքի ամբողջական սկանավորում:
ATLAS համակարգը 2017 թվականին իր մեկնարկից ի վեր հայտնաբերել է ավելի քան 700 մերձերկրյա աստերոիդներ և 66 գիսաստղեր: Երկու աստերոիդներ՝ 2019 MO և 2018 LA, բախվել են Երկրին։ Առաջինն ընկել է Պուերտո Ռիկոյի հարավային ափից, իսկ երկրորդը՝ Բոտսվանայի սահմանի մոտ։ Այս աստերոիդները փոքր էին և ոչ մի վնաս չպատճառեցին:
Այս տարվա մայիսին 18 երկրների 100-ից ավելի աստղագետներ մասնակցել են Երկրի աստերոիդների հետ բախումից մոլորակների պաշտպանության միջազգային վարժանքներին։ NASA-ն գնահատում է, որ առնվազն առաջիկա 100 տարում Երկրին աստերոիդների մեծ հարվածի վտանգ չի սպառնում:
Սեպտեմբերին ՆԱՍԱ-ն փորձ կատարեց Դիմորֆ աստերոիդի հետագիծը փոխելու համար։ Դրան մխրճվել է DART սարքը։ Սա առաջին դեպքն է, երբ մարդկությունը միտումնավոր փոխում է տիեզերական օբյեկտի շարժումը և աստերոիդների շեղման տեխնոլոգիայի առաջին ամբողջական ցուցադրությունը: Նախքան DART-ի հետ բախումը Դիմորֆը պտտվել է Դիդիմայի շուրջ 11 ժամ 55 րոպե ժամանակահատվածով գրեթե շրջանաձև ուղեծրով։ Զոնդին հաջողվել է ժամանակահատվածը փոխել 32 րոպեով՝ մինչև 11 ժամ 23 րոպե։
Սիրարփի Աղաբաբյան
