Տպել
2023 թվականին նախատեսվում է Հայաստանում ներդնել նոր նորածնային սքրինինգային ծրագիր ` ադրենոգենիտալ համախտանիշի: Այս մասին հայտնում է ՀՀ առողջապահության նախարարությունը։
Նպատակն է մինչև կլինիկական ախտանշանների դրսևորումը` ադրենոգենիտալ համախտանիշով երեխաներին հայտնաբերել և բուժումը կազմակերպել ժամանակին:
Մեր երկրում իրականացվող սքրինինգային ծրագրերից 6-ը նորածնային են` ուղղված բնածին, ժառանգական հիվանդությունների հնարավորինս վաղ ախտորոշմանը, հիվանդության ժամանակին բուժմանը կամ ախտաբանական վիճակի շտկմանը։
Սքրինինգային ծրագրերն իրականացվում են հիվանդությունների կանխարգելման ու վաղ հայտնաբերման նպատակով: Դրանք հնարավորություն են տալիս ախտորոշելու այնպիսի հիվանդություններ, որոնց զարգացումը կարող է հանգեցնել հաշմանդամության, երբեմն էլ՝ մահվան։
