Տպել
Հինգ տարվա ընդմիջումից հետո Բեյոնսեն մեկնում է համաշխարհային շրջագայության՝ ի աջակցություն իր «Renaissance» ալբոմի։ Փոփ-դիվան կունենա ընդամենը 27 համերգ, որոնցից 12-ը տեղի կունենան Եվրոպայում։
Թագուհի Բին շատ ինքնաբուխ հայտարարեց բեմ վերադառնալու մասին։ Նրա շրջագայության մեկնարկը տրվում է Սթոքհոլմից եւ եզրափակվում Նոր Օռլեանում։ Բոլոր համերգների տոմսերը վաճառքի կհանվեն փետրվարի 6-ից։
Ցավոք սրտի՝ Երեւանն ընդգրկված չէ երգչուհու շրջագայության մեջ, չնայած հուսանք՝ HAYA փառատոնի շրջանակում նման հնարավորություն կստեղծվի նաեւ հայ հանդիսատեսի համար։ Փառատոնն արդեն հասցրել է Երեւանում հյուրընկալել 50 Cent-ին, ZAZ-ին եւ Led Zeppelin Symphinic-ին, իսկ առաջիկայում սպասվում է Քրիստինա Ագիլերայի այցը։
Մինչ HAYA փառատոնը կմտորի Բեյոնսեի հրավերի շուրջ, կարելի է փորձել փոքրիկ ճանապարհորդություն իրականացնել եւ վայելել փոփ թագուհու կենդանի կատարումները։
Թագուհուն լսելը, սակայն, էժան հաճույք չէ։ Հայերի համար ամենաբյուջետային ուղղությունները եվրոպական երկրներն են։ Շրջագայության օրերին Երեւանից ուղիղ չվերթով կարելի է մեկնել Բրյուսել, Փարիզ, Վարշավա եւ Ֆրանկֆուրտ։ Ամենաէժան թռիչքը դեպի Փարիզ ուղղությունն է։ Այն իրականացնում են FlyOne եւ Transavia ավիաընկերությունները։
Չվերթի արժեքները՝ ըստ Skyscanner-ի, kiwi-ի, Transavia-ի եւ FlyOne-ի․
Երեւան-Բրյուսել-Երեւան չվերթը միջինիում կարժենա 400$
Երեւան-Փարիզ-Երեւան չվերթը՝ 300 – 350$
Երեւան-Վարշավա-Երեւանը՝ միջինիում 470$
Երեւան-Ֆրանկֆուրտ-Երեւան չվերթը միջինում կարժենա 960$
Ամենաէժան չվերթը դեպի Փարիզն է, բայց պատրաստ եղեք այնտեղ մնալու համար կլորիկ գումար վճարել։
Մարզադաշտի մոտ գտնվող մահճակալի արժեքը երկու գիշերվա համար սկսվում է 110 դոլարից։ Բրյուսելում մարզադաշտից 3-4 կիլոմետր հեռավորության վրա գտնվող սենյակը սկսվում է 150 դոլարից։ Վարշավայում համերգային օրերի շրջանակում այցի արժեքը կկազմի 100, իսկ Ֆրանկֆուրտում՝ 150 դոլար:
