Տպել
Ամերիկյան դերասան Ջո Մանգանյելոն PBS-ով հեռարձակվող Finding Your Roots («Գտնելով արմատներդ») սերիալի շրջանակում պատմել է, թե ինչպես է իր մեծ տատը մազապուրծ եղել Հայոց ցեղասպանությունից:
Ինչպես գրում է Daily Mail-ը, Մանգանյելոն մանրամասնել է իր նախնու՝ թուրքերի իրականացրած Ցեղասպանությունից խուսափելու հուզիչ պատմությունը: Նա պատմել է, թե ինչպես է իր մեծ տատիկը փախել Հայաստանից 1915 թվականին՝ ամուսնու և յոթ երեխայի սպանության ականատեսը դառնալուց հետո:
«Թուրքերը 1915 թվականին, Առաջին համաշխարհային պատերազմի քողի տակ, մտել են նրա տուն և փորձել իրականացնել իրենց սկսած Ցեղասպանությունը: Կրակել են ամուսնուն, հետո՝ նրան. նա պառկել է գետնին, ձևացրել, թե մեռած է, ապա հնչել է ևս 7 կրակոց. նրա յոթ երեխաներն էին: Նա անշարժ պառկել է, թուրքերը հեռացել են տնից և ութերորդ երեխային, որն օրորոցի մեջ էր, թողնել են սովամահ լինելու. նրանք հենց այդպես էին վարվում», – պատմել է դերասանը։
Մանգանյելոն մանրամասնել է, թե ինչպես է իր մեծ տատիկը կապել երեխային մեջքին և փախել քաղաքից։ Նա հազիվ է խուսափել մահվան երթի սարսափելի ճակատագրից, որը նկարագրել է Մանգանյելոն:
«Նրանք ուղղակի ձեռնաշղթաներ էին կապում, շղթայակցում էին հայերին և դուրս էին բերում անապատ, իսկ քրդերին ազատում, զինվորական վերարկուներ, ձիեր ու հրացաններ էին տալիս, որպեսզի հետո նրանք գնային իրենց երդվյալ թշնամիների՝ հայերի հետ անելու այն, ինչ ուզում էին։ Նա դրանից խուսափել է: Երեխան մեջքի վրա՝ հասել է Եփրատ գետը, լողալով անցել է այն, և երբ նա հասել է մյուս ափը, երեխան խեղդվել է», – պատմել է կինոաստղը:
Մանգանյելոն ավելացրել է, որ իր մեծ տատիկը շատ դիմացկուն էր և ապրել է քարանձավում այլ փախստականների հետ, մինչև որ նրանց բռնել են գերմանացի զինվորականները։ Մանգանյելոյի մեծ տատը, ի վերջո, ռազմական ճամբարում հղիացել է գերմանացի սպայից և ծնել շիկահեր, կիսագերմանացի երեխայի։
Rolling Stone-ին տված հարցազրույցում աստղը պատմել է, թե ինչն է ստիպել իրեն մասնակցել Finding Your Roots-ին և նկարագրել է իր տոհմածառի պատմության վրա լույս սփռելու փորձի մասին:
Ի վերջո Finding Your Roots-ը պարզել է, որ հայուհուն հղիացրած գերմանացի սպան Կառլ Վիլհելմ Բոյթինգերն էր, որը դրանից հետո վերադարձել է ընտանիքի մոտ՝ Գերմանիա:
Ավելի մանրամասն՝ tert.am
