«Ֆիլմարտադրողների Համահայկական Ֆեդերացիայի» խորհրդի նախագահ Հովհաննես Գալստյանը՝ Բեռլինալեի մասնակցության նպատակով մեկնել է Բեռլին

Բեռլինի ﬕջազգային կինոփառատոնի եւ Եվրոպական կինոշուկայի հրավերով, Եվրոպական կինոշուկայի «Բազմազանություն եւ ներգրավվածություն» ծրագրի շրջանակներում, փետրվարի 15-21-ը՝ Բեռլինալեին մասնակցելու նպատակով, Բեռլին է ﬔկնելու «Ֆիլմարտադրողների Համահայկական Ֆեդերացիայի» խորհրդի նախագահ, կինոռեժիսոր, պրոդյուսեր Հովհաննես Գալստյանը։ Այս մասին հայտնում են «Ֆիլմարտադրողների համահայկական ֆեդերացիա» ՀԿ մամուլի ծառայությունից։

«Բազմազանություն եւ ներգրավվածություն» ծրագիրը իրականացվում է հավասար մրցակցության հնարավորություններից զրկված կինոպրոֆեսիոնալների մուտքը գլոբալ կինոինդուստրիա ապահովելու, թերլուսաբանված կինոհանրությունների ձայնը լսելի դարձնելու և գլոբալ կինոինդուստրիայում խաղի արդար կանոնների հաստատմանը նպաստելու համար։ Հովհաննես Գալստյանի թեկնածությունն առաջադրել է Եվրոպական Աուդիովիզուալ Ձեռնարկատերեր կառույցը՝ EAVE-ն, որը Եվրոպայում գործող աﬔնախոշոր մասնագիտական կինոհամայնքն է։

Եվրոպական կինոշուկայում հաստատված են երեք տասնյակից ավելի հանդիպուﬓեր կինոինդուստրիայի պրոֆեսիոնալների՝ պրոդյուսերների, վաճառքի գործակալների, կինոփառատոների, կինոինստիտուտների և ֆոնդերի ներկայացուցիչների հետ: Այդ թվում պաշտոնական հանդիպուﬓեր Եվրոպական Աուդիովիզուալ Ձեռնարկատերեր (EAVE) կառույցի գործադիր տնօրեն Սատու Էլոյի և Եվրոպական Պրոդյուսերների Ակումբի (EPC) գործադիր տնօրեն Ալեքսանդրա Լեբրետի հետ։

Հովհաննես Գալստյանը Բեռլինում ներկայացնելու է «Ֆիլմարտադրողների Համահայկական Ֆեդերացիա» կառույցի ծրագրերն ու նպատակները, կառույցի անդաﬓերի կինոնախագծերը։ Մասնավորապես, ինդուստրիայի պրոֆեսիոնալներին է ներկայացվելու նորավարտ «Բեքսթեյջ» (Հայաստան, Գերմանիա, Լյուքսեմբուրգ) ֆիլﬕ արտադրության փորձը։

Հիշեցնենք, որ «Բեքսթեյջը» Հայաստանի անկախության շրջանի ﬕակ ֆիլﬓ է, որը քրեական գործով հետաքննության առարկա է դարձել, ինչի արդյունքում ապօրինաբար կասեցվել է արտադրող ընկերության ֆիլﬔրի արտադրությունը։ Ֆիլմը էկրան կբարձրանա այս գարնանը։

Բեռլինալեի ավարտից հետո «Ֆիլմարտադրողների Համահայկական Ֆեդերացիա» ՀԿ-ն հանդես կգա մամուլի ասուլիսով, որի ընթացքում խորհրդի անդաﬓերը կներկայացնեն ֆեդերացիայի նպատակները, հայկական կինոյի վերջին վեց տարիների աղետալի վիճակագրությունը և Բեռլինալեի մասնակցության արդյունքները։