Տպել
Ճապոնական սակե արտադրողը ցանկանում է ալկոհոլային խմիչք արտադրել տիեզերքում։ Asahi Shuzo ընկերությունը, որն արտադրում է հանրահայտ Dassai-ի սակեն, նախատեսում է անհրաժեշտ բաղադրիչներն ուղարկել Միջազգային տիեզերակայան (ISS)՝ հատուկ խմիչք պատրաստելու համար:
Եթե ամեն ինչ ընթանա ըստ ծրագրի, ապա շշի գինը կարող է աստղաբաշխական լինել՝ 100 մլ ծավալով մեկ շիշը Երկրի վրա կվաճառվի 653.000 դոլարով:
Այնուամենայնիվ, Սոյա Ուեցուկին, ով ղեկավարում է Asahi Shuzo-ի նախագիծը, CNN-ին ասել է, որ «խմորման փորձարկումներում 100% հաջողության երաշխիք չկա»: Ձգողության ուժի փոփոխությունը կարող է ազդել, թե ինչպես է ջերմությունը փոխանցվում հեղուկներում, ինչի արդյունքում խմորման գործընթացը տիեզերքում Երկրի վրայի գործընթացից տարբերվում է:
Ավանդաբար, սակե պատրաստելու համար պահանջվում է երկու ամիս, որի ընթացքում խմիչքն անցնում է գոլորշու, խառնման եւ խմորման գործընթացը:
Asahi Shuzo-ն վճարել է Ճապոնիայի Ավիատիեզերական Հետախուզական Գործակալությանը ISS-ի մի մասի՝ Կիբո փորձարարական մոդուլի մուտքի համար, որպեսզի կարողանան թեստեր անցկացնել «հատուկ միկրոգրավիտացիոն միջավայրում»:
Բրենդը հայտնի է իր թանկարժեք, պրեմիում ապրանքներով, որոնց համար կոլեկցիոներները հազարավոր դոլարներ են ծախսում, բայց նրանց տիեզերական արկածը ավելին է, քան պարզապես կոլեկցիոներների համար գերհազվագյուտ խմիչք պատրաստելու միջոց:
Ընկերությունը ցանկանում է հասկանալ, թե ինչպես է խմորումը տեղի ունենում տիեզերքում եւ հույս ունի, որ մի օր Լուսնի վրա կարտադրվի սակե:
«Ապագայում, երբ մարդիկ կարողանան ազատ ճանապարհորդել Լուսնի եւ Երկրի միջեւ, ոմանք կայցելեն Լուսին որպես զբոսաշրջիկներ: Այս նախագծի նպատակն է ստեղծել սակե, որը կարելի է վայելել լուսնի վրա՝ թույլ տալով այցելուներին հաճելի ժամանակ անցկացնել այնտեղ»,-ասել է նա:
Նա հավելել է, որ գուցե դա նույնիսկ կարող է հանգեցնել տիեզերքում խմորված մթերքների արտադրությանը։ «Շատ ճապոնական մթերքներ, ինչպիսիք են նատոն եւ միսոն, խմորվում են, եւ այս տեխնոլոգիան կարող է ընդլայնվել այդ տարածքներում»,-ասել է Ուեցուկին:
