Տպել
Երգչուհի Սիլվա Հակոբյանը վերջին շրջանում հաճախ է բացակայում երկրից, քանի որ արտերկրյա համերգները երգչուհու աշխատանքի ծանրակշիռ մասն են կազմում: Life.panorama.am-ը երգչուհու առաջիկա անելիքների մասին խոսել է Սիլվայի հայրիկի՝ Հակոբ Հակոբյանի հետ, ով զբաղվում է նաև երգչուհու պրոդյուսինգով:
Մեզ հետ զրույցում Սիլվայի հայրիկը նշեց, որ այս պահին երգչուհու ընտանիքի համար ամենակարևորը Սիլվայի ամուսնությունն է.
«Այս պահին որպես հայր ամենաառաջինը մտածում եմ Սիլվայի ամուսնության մասին: Սիլվայի կյանքում այդ կարևոր արարողությունը կկայանա մինչև մայիս: Հիմա մենք նաև տեղափոխվում ենք նոր բնակարան, ու այդ հարցերով ենք զբաղված: Այնպես որ, աշխատանքային ծրագրերից զատ, հիմա անձնական հարցերով ենք զբաղված: Սիլվան ունի մեծ ճանաչում ու սեր, մնում է իր երազած ընտանիքը կազմի ու երջանիկ լինի»,- նշեց մեր զրուցակից:
Մեր նկատառմանը, թե կարծիքներ կան, որ Սիլվան ամուսնությունից հետո մշտական բնակությամբ կտեղափոխվի Մոսկվա, պատասխանեց.
«Նման բան չի կարող լինել, քանի որ մենք Սիլվայից չենք կարողանա 10 մետրից հեռու գտնվել: Մեր ու նրանց բնակարաններն անգամ շատ մոտ են, սա հատուկ ենք մտածել, քանի որ գործնական իմաստով ևս մենք շատ կապված ենք իրար ու չենք կարող իրարից հեռու լինել»:
Թեև հարսանեկան նախապատրաստությունները շատ ժամանակ են պահանջում, բայց այդ ընթացքում Սիլվան աչքաթող չի անի նաև աշխատանքը.
«Ինչպես արդեն հայտնի է՝ Արամեն ու Սիլվան համերգներ են տվել ՌԴ-ի արևմուտքում, հարավում ու հյուսիսում, մնացել է արևելյան հատվածի քաղաքներում նախատեսված համերգները, որն էլ կիրականցվի ապրիլին: Մինչ այդ Սիլվան կմասնակցի նաև իր լավ ընկերոջ՝ Արամեի, մոսկովյան մենահամերգին: Այդ օրը նրանք կներկայացնեն նաև իրենց նոր զուգերգը, որի պրեմիերան կկայանա մոտ օրերս: Ի դեպ՝ շատ գեղեցիկ հայրենասիրական երգ է՝ ժամանակի հոգով ու շնչով գրված, որի երաժշտության հեղինակը Մանե Հակոբյանն է, իսկ խոսքերը գրել է Ավետ Բարսեղյանը»,- նշեց նա:
Հետաքրքրվելով, թե աշխատանքային ի՞նչ նորություններ են սպասվում հայաստանյան հանդիսատեսի համար, Սիլվա Հակոբյանի հայրիկը նշեց.
«Կդժվարանամ ասել, թե արդյոք մինչ հարսանիք կհասցնենք տեսահոլովակ նկարահնել, բայց հաստատ տարվա ընթացքում նորություններ կլինեն: Արդեն հաջորդ տարի նախատեսվում է մեծ մենահամերգ Երևանում, Մոսկվայում և ԱՄՆ-ում, որի նախապատարաստական աշխատանքները կսկսենք այս տարվանից»:
