Տպել
Բաբկեն Պիպոյանը ֆեյսբուքյան իր էջում գրում է. «Ընտրություններին ընդառաջ.
Նախագահականից խորհրդարանական դարձած կառավարման համակարգում թերևս առաջին լուրջ ընտրություններն ապրիլին կայանալիք ընտրություններն են: Ցավալի է, սակայն ընտրություններից ընդամենը հաշված օրեր առաջ քաղաքացիների գերակշռող մեծամասնությունը դեռևս չի պատկերացնում և ծանոթ չէ ընտրության կարգին: Ցավոք, սակայն քաղաքացիների գերակշռող մեծամասնությունը չգիտի` ինչ է ռեյտինգային ընտրակարգը, իսկ այս տրամաբանության մեջ իրականում հարյուր տոկոս համամասնական ընտրակարգը վերածվում է հարյուր տոկոս մեծամասնական ընտրակարգի:
Կարծում եմ՝ բոլոր քաղաքական ուժերն այս իմաստով ունեն մեծ անելիք. բացատրել մինչ օրս «անձեր» ընտրած քաղաքացիներին, որ սա ոչ թե անհատների, այլ քաղաքական ուժերի ընտրություն է, և ընդամենը հնարավորություն է տրված ընտրելու նաև որևէ թեկնածուի, եթե իհարկե կողմնորոշվել ես, թե որ քաղաքական ուժին ես ձայն տալու: Ավելին` կարող են ընտրել միայն քաղաքական ուժին` չնշելով ռեյտինգային որևէ թեկնածուի անուն:
Պետք է քաղաքացիներին իրազեկել, որ այս ընտրությունները ամենակարևորն են առաջիկա տարիների համար: Այս ընտրությունները վարչապետի ընտրություններ են, գործադիրի, ինչու չէ նաև նախագահի: Հայաստանն այլևս խորհրդարանական պետություն է, և ավելի ազնիվ ու ազդեցիկ կլինի, եթե քաղաքական ուժերը ներկայացնեն ոչ միայն ծրագիր, այլև կաբինետը. Ով է վարչապետի թեկնածուն, ովքեր են լինելու գործադիրում, ովքեր` օրենսդիրում:
Եթե այս ամենը չիրականացվի, այդպես էլ քաղաքացին կգնա պատգամավոր ընտրելու` առանց գիտակցելու իր ձայնի նշանակությունն ու կարևորությունը»:
