Տպել
Ավստրալիայի Քվինսլենդի նահանգի ափերին մոլեգնում է «Դեբի» արևադարձային ցիկլոնը: Իրադարձությունների վայրից տեսանյութ է հրապարակել Ruptly-ն:
Քամու պոռթկումները հասնում են ժամում 263 կիլոմետրի: Ինչպես նշում է BBC-ն, Բոուեն քաղաքում չկա էլեկտրականություն, իսկ Էռլի-Բիչ քաղաքի բնակիչները սոցցանցերում գրում են, որ ճոճվում են տների տանիքները: Տարհանվել են ափամերձ շրջաններում ապրող ավելի քան 25 հազար բնակիչներ:
Ինչպես նշել են տեղի իշխանությունների ներկայացուցիչները, սա ամենահզոր ցիկլոնն է վերջին վեց տարվա ընթացքում:
Ինչպես արդեն տեղեկացվել է, Ավստրալիայի վարչապետ Մալքոլմ Թեռնբուլը հայտարարել է Քվինսլենդի նահանգում բնական աղետների պայմաններում աշխատանքի ֆեդերալ պլանի կիրարկման մասին: «Քվինսլենդի հյուսիս – արևելքում իրադրությունը շեշտակիորեն վատթարանում է»,- արձանագրել է կառավարության ղեկավարը՝ ելույթ ունենալով խորհրդարանում: Նա նշել է, որ ցիկլոնի էպիկենտրոնի մոտ քամու պոռթկումների ուժը հասնում է ժամում 270 կիլոմետրի: «Ճգնաժամային տարածաշրջան են ուղարկվել շուրջ հազար զինվորականներ, որոնք լիովին պատրաստ են օգնություն ցույց տալ»,- նշել է Թեռնբուլը:
Ավստրալիայի Ապահովագրական ընկերությունների ազգային խորհուրդն արդեն «Դեբի» ցիկլոնը հայտարարել է բնական աղետ: Հետագայում դա պետք է տարերքից տուժած մարդկանց համար զգալիորեն հեշտացնի վնասի փոխհատուցման հայցեր հարուցելու գործընթացը:
