Ադրբեջանական հայտնի ընտանիքը Թրամփի համար գլխացավանք է դարձել

ԱՄՆ սենատի մի խումբ անդամներ նախագահ Թրամփի՝ Ադրբեջանում ծավալած բիզնես գործունեությունը ստուգելու համար դիմել են դաշնային հեռախուզությանը:

Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:

Սենատի անդամները դաշնային հետախուզությանը կոչ են արել այդ գործունեությունը ուսումնասիրել կոռուպցիայի դեմ պայքարի և պատժամիջոցների օրենքի շրջանակներում և պարզել արդյոք խախտումներ կան, թե ոչ:

ԱՄՆ սենատորներ Շերրոդ Բրաունը, Բեն Քադինը և Դայան  Ֆենշտեյնը իրենց մտահոգությունը հայտնել են ԱՄՆ ֆինանսների նախարարին, գլխավոր դատախազին և Հետաքննությունների դաշնային բյուրոյի տնօրենին ուղղված նամակում:

Բրաունը, Քարդինը և Ֆենշտեյնը հանդիսանում են ԱՄՆ սենատի Բանկային, բնակարանաշինության և քաղաքաշինության, արտաքին գործերի և արդարադատության հանձնաժողովների անդամներ:

ԱՄՆ կոնգրեսի հրապարակման համաձայն` սենատորների մտահոգության պատճառ է հանդիսացել Նյու Յորքեր ամսագրում 2017-ի մարտի 13-ին տպագրված «Դոնալդ Թրամփի ամենավատ համաձայնագիրը» վերնագրով հետազոտական հոդվածը:

Հոդվածում խոսվում է ԱՄՆ նախագահ Թրամփի և Ադրբեջանի տրանսպորտի նախկին նախարար Զիյա Մամմեդովի ընտանիքի միջև եղած կապերի մասին:

Հոդվածի համաձայն` Մամմեդովները կապ ունեն Իրանի իսլամական հեղափոխության պահապանների կորպուսի հետ, որը Իրանում հանդիսանում  էլիտար ռազմական ստորաբաժանում  եւ անմիջապես ենթարկվում է Իրանի հոգեւոր առաջնորդ Ալի Խամենեիին: Կորպուսը ստեղծվել է 1979-ին և բավական մեծ եւ որոշիչ ազդեցություն ունի երկրի քաղաքական կյանքում:

Սենատորների կարծիքով  բիզնեսը կարող է միջոց հանդիսանալ փողերի լվացման և Իրանի իսլամական հեղափոխության պահապանների կորպուսի հետ այլ անօրինական գործարքներ իրականացնելու համար:

Սենատորներն իրենց գրած նամակում նշում են, որ Trump Organization ընկերության և Մամմեդովների ընտանիքի մեջ եղած կապը կասկածներ է առաջացնում:

Սենատորների նամակում ասվում է  որ պետք է մանրակրկիտ ուսումնասիրություն կատարվի, քանի որ կարող է պարզվել, որ Trump Organisation ընկերության կատարած գործարքների արդյունքում Թրամփը և նրա կազմակերպությունը գտնվում են Ադրբեջանի կոռումպացված օլիգարխների և  Իրանի իսլամական հեղափոխության պահապանների կորպուսի ազդեցության տակ:

«Այս ամենը կնշանակի, որ Trump Organisation-ը խախտել է ԱՄՆ պատժամիջոցների մասին օրենքը»,- նշել են սենատորները:

Նամակում նշվում է , որ չնայած Trump Organisation-ը Ադրբեջանում դադարեցրել է իր գործունեությունը, նրա պոտենցիալ քրեական պատասխանատվության և քննության հարցը մնացել է անպատասխան:

Սենատորները Արդարադատության նախարարությանը խնդրել են մանրամասն ուսումնասիրության ենթարկել Trump Organization-ի և Ադրբեջանի տրանսպորտի նախկին նախարար Զիյա Մամմեդովի, նրա որդի Անարի և եղբոր Էլթոնի հետ ունեցած կապերը:

ԱՄՆ ԶԼՄ-ները սրանից առաջ էլ են անդրադարձել Մամմեդովների ընտանիքի,  Trump Organisation –ի և Իրանի Իսլամական հեղափոխության պահապանների կորպուսի  հետ ունեցած  հնարավոր հարաբերություններին: Այս ամենի շուրջ մի շարք միջազգային լրատվամիջոցներ հարց են ուղղել Մամմեդովներին սակայն հարցերը մնացել են անպատասխան:

Ամերիկյան հայտնի «Խոսքի ազատությունը ժողովրդի համար»  հասարակական կազմակերպությունը նույնպես Նյու Յորքի դատախազ Էրիկ Շնայդերմանից պահանջել է ստուգել ԱՄՆ նախագահ Դոնալդ Թրամփի բիզնես հոլդինգի ծավալած գործունեությունը:

Կազմակերպությունը մարտի սկզբին ամերիկյան հեղինակավոր «Նյու Յորքեր» ամսագրում տպագրած հոդվածում, մասնավորապես, անհանգստություն էր հայտնել Թրամփին պատկանող Trump Organization ընկերության և Ադրբեջանի նախկին տրանսպորտի նախարար Զիա Մամեդովի ընտանիքի միջև եղած բիզնես կապերի վերաբերյալ:

Կազմակերպությունը դատախազությունից պահանջել «արտաքին կոռուպցիոն դրսևորումների» հատկանիշներով ստուգել  Trump Organization-ի և Զիա Մամեդովի ընտանիքին պատկանող բիզնեսների միջև կատարված գործարքները:

Դեռևս 2016-ի դեկտեմբերին «Արմենպրես»-ը, հղում կատարելով azadliq.info-ին՝ տեղեկացրել էր, որ ԱՄՆ ընտրված նախագահ Դոնալդ Թրամփի ընկերությունը (Trump Organization) դադարեցնում է Ադրբեջանում իրականացվող նախագծերի լիցենզավորված պայմանագրերը:

Trump Organization-ի փոխնախագահի փոխանցմամբ`Թրամփի այս որոշումը պայմանավորված էր նրանով, որ նորընտիր ԱՄՆ նախագահը 2017 թվականի հունվարի 20-ին տեղի ունեցած նախագահական երդմնակալությունից առաջ ցանկանում էր խուսափել բիզնես շահերի եւ իր քաղաքական դերի հնարավոր հակասություններից:

Բաքվի կենտրոնում գտնվող Trump Tower անվանումը կրող 33 հարկանի հյուրանոցի շինարարական աշխատանքները ավարտվել էին դեռեւս 2015 թվականին, սակայն հյուրանոցի բացումը չէր կատարվել:

Դեռ 2016-ի մայիսին The Washington Post թերթը հոդված էր հրապարակել այն մասին, որ վերոհիշյալ աշտարակը պատկանում է ոչ թե Դոնալդ Թրամփին, այլ Ադրբեջանի տրանսպորտի և կապի նախարար Զիա Մամեդովի որդուն՝ Անար Մամեդովին: Վերջինս հանդիսանում է «Գարանտ Հոլդինգի» տնօրենը և Trump Tower-ի սեփականատերը: Անար Մամեդովը Թրամփից պարզապես գնել էր վերջինիս անվանումը: