Տպել
Life.panoram.am-ը զրուցել է նոր՝ «Իմ» տեսահոլովակի և հղիության վերջին շրջանի մասին:
«Իրականում «Իմ» երգն արդեն երկար տարիների պատմություն ունի: Այս ստեղծագործությունը հատուկ մտածված աշխատանք չէ: Շուրջ չորս տարի առաջ Արթուր Ալեքը գրեց այս երգի երաժշտությունն ու ինձ նվիրեց: Մեղեդին առաջին անգամ լսելով՝ ողջ օրը մտքումս էր, հենց այդ օրն էլ ինքնաբերաբար խոսքեր եկան ու մի քանի ժամում գրեցի երգի բառերը: Չգիտեմ ինչի հետ էր սա կապված, բայց հստակ կարող եմ ասել, որ այն հոգու թելադրանք էր, ես ու ամուսինս այն ժամանակ արդեն միասին էինք և մեր սերն էլ ինձ շատ էր ոգեշնչել»,- պատմեց Սուսաննան, նշելով, որ «Իմ» երգի համար տարիներ առաջ տեսահլոովակ նկարվել է, բայց չի ներկայացվել.
«Տարիներ առաջ այս երգի հիման վրա տեսահոլովակ նկարահանվեց, որը տեխնիկական խնդիրների պատճառով այդպես էլ չհրապարակվեց: Անցյալ տարի կրկին ցանկացա այն տեսահոլովակով ներկայացնել, բայց քանի որ տարիներ էին անցել ու ես էլ կյանքի այլ փուլում էի՝ նոր էի ամուսնացել, որոշեցի «Իմ» երգի տեսահոլովակը համապատասխան լինի նաև կյանքիս ընթացքին և նոր հոլովակ նկարեցինք: Ասեմ, որ այս տեսահոլովակը նկարահանվել է ընդամենը երկու ժամում, որից էլ ժամեր անց ես ու ամուսինս մեկնեցինք Չինաստան: Իհարկե, այդ ամենը տեղի ունեցավ Նիկ Եգիբյանի շնորհիվ»,- մանրամասնեց երգչուհին:
Տեսահլովակում Սուսաննան ներկայացել է սեփական հարսանեկան զգեստով, ավելին՝ նկարահանվել է նաև նրա ամուսինը, ով սովորաբար խուսափում է տեսախցիկներից և հանրային կյանքից.
«Այս պարագայում ևս պետք է ասեմ, որ եթե չլիներ Նիկը, ապա չէր լինի նաև «Իմ»-ը տեսահոլովակի այս տարբերակը: Նա կարողացավ համոզել ամուսնուս փոքրիկ կադրերով նկարահանվել, քանի որ երգը գրել էի հենց ինձ ու ամուսնուս պատկերացնելով, այն ասես ինչ-որ իմաստով նաև մեր սիրո երգը լինի, թեև խոսքերի որոշ իմաստներին համապատասխան՝ մեր կյանքում, փառք Աստծո, տխուր պահեր չեն եղել: Ինչ վերաբերվում է հարսանեկան զգեստին, այդ ժամանակ մեր ամուսնությունից ընդամենը մեկ ամիս էր անցել, դեռևս այդ ամենի ազդեցությունն էինք զգում մեր կյանքում, Նիկն էլ առաջարկեց, որպեսզի հենց իմ զգեստով նկարահանվեմ, որը նաև շատ խորհրդանշական կլիներ»,- պատմեց մեր զրուցակիցը:
Սուսաննա Պետրոսյանն այժմ ապրում է կյանքի ամենահաճելի պահերը, նա գտնվում է հղիության վերջին շրջանում: Խոսելով կնոջ ամենակարևոր առաքելության մասին՝ երգչուհին նկատեց.
«Բառերով բացատրել ու արտահայտել այն, թե ինչ է կատարվում կնոջ ներսում, երբ բալիկի է սպասում, ինչ խոսք, դժվար է: Եթե տարիներ առաջ մտածում էի, որ կյանքդ բաժանվում է ամուսնությունից առաջ և հետո շրջանների, ապա հիմա հասկանում ես, որ իրականում կյանքդ ուրիշ է երեխայից առաջ և հետո: Հիմա գիտակցում եմ, որ երեխան իմաստավորելու է կյանքս, ամբողջովին փոխելու է այն, ինչ ունեմ, նրա ծնունդից հետո սկսելու եմ մեծ երջանկությամբ ու սիրով շարժվել իր թելադրանքով: Կարծում եմ՝ կնոջ ամենակարևոր առաքելությունն ու երջանկությունը մայր դառնալն է: Հիմա իմ մեջ ասես մի քանի զգացողություններ են խառնվել իրար՝ հուզմունք, պատասխանատվություն, անասելի երջանկություն և այլն»:
Սուսաննա Պետրոսյանն ու ամուսինը պսակադրությունից հետո մեկնեցին Չինաստան, և շատերին թվում էր, թե փոքրիկը Հայաստանում չի ծնվի: Այս առումով երգչուհին նշեց, որ շատ են կարևորել, որ իրենց երեխան ծնվի Հայաստանում.
«Նախ հաստատ չէինք ցանկանա, որ մեր բալիկը Չինաստանում ծնվեր: Մենք ցանկացանք, որ մեր բալիկը ծնվի Հայաստանում, մեր հարազատների շրջապատում: Այս շրջանում հատկապես հարազատների ներկայությունը շատ կարևոր է, վերջապես նրանց համար էլ է երջանկություն տեսնել մեր փոքրիկի հետ կապված առաջին պահերը»,- ավարտեց երգչուհին:
