Ո՞ւմ զանգեմ՝ էս հարցը լուծվի. Ալիկ Սարգսյանն ու մի շարք պատգամավորներ մնացել են առանց աշխատասենյակ. newsbook.am
Advertisement 1000 x 90

Ո՞ւմ զանգեմ՝ էս հարցը լուծվի. Ալիկ Սարգսյանն ու մի շարք պատգամավորներ մնացել են առանց աշխատասենյակ. newsbook.am

ՀՀԿ-ական պատգամավորների մի մասի համար օրը նյարդային է: Երկու օր է՝ խորհրդարանում են, սակայն առանց աշխատասենյակ: Առաջին դժգոհողը նախկին ոստիկանապետ Ալիկ Սարգսյանն է:

Ում որ հանդիպում է միջանցքում, միանգամից բողոքում է, որ դեռ աշխատասենյակ չունի:

Նրա բողոքը նախ փորձեց փարատել Սամվել Ֆարմանյանը: Ասաց, թե ԱԺ-ն աշխատակազմի ղեկավար չունենալու պատճառով որոշակի խնդիրներ է առաջացել, բայց առաջիկայում հարցը կլուծվի: Խորհրդարանի միջանցքում բողոքող գործընկերոջը միացավ նաև Ֆելիքս Ցոլակյանն ու Նաիրի Ցոլակյանը: Նրանց ևս աշխատասենյակ չի հասել:

Կամ միջանցքներում ծխում են, կամ գործընկերներն խնդրում են իրենց հյուրընկալել իրենց: Ճիշտ է՝ Ալիկ Սերգեիչի նման ձայնը գլուխը չէին գցել, բայց կանգնելով նրա կողքին՝ գլխի շարժումով հասկացրեցին, որ կիսում են բողոքը:

Սարգսյանը, դիմելով առանց սենյակ մնացած գործընկերներին, որոշեց հարցերի լուծման այլընտրանք առաջարկել.

«Ո՞ւմ զանգեմ՝ էս հարցը լուծվի: Բացի մի տեղից, սաղ տեղերը կարամ զանգեմ, էդ մի տեղն ամոթ ա, որ էս հարցով զանգեմ: Հին դեմքերից կան էլի, ում էլ զանգեմ՝ հարցը կլուծեն»:

Ճիշտ է՝ Սարգսյանը դեռ ոչ մի տեղ չի զանգել և հարցն էլ չի լուծվել, բայց նա միջանցքում կանգնած հույսով սպասում է աշխատասենյակ ստանալուն: Ի դեպ, դժգոհողների շարքերը որքան գնում, այնքան բազմանում են:

«Ծառուկյան» դաշինքի պատգամավորներից շատերն ևս աշխտասենյակ չունեն: Նրանք ստիպված ժամանակն անցկացնում են խմբակցության սենյակում՝ մինչ ծագած խնդիրների լուծվելը:

Newsbook.am