Տպել
ՄԱԿ-ի արդյունաբերության զարգացման կազմակերպությունը հավակնոտ ծրագիր է սկսել` Հայաստանին տրամադրելով 2 միլիոն դոլար տեքստիլի և կոշկագործության ոլորտը զարգացնելու համար: ՄԱԿ-ի արդյունաբերության զարգացման կազմակերպության ծրագրի խմբի ղեկավար Անիտա Տրավիանի խոսքով` Հայաստանում այս ոլորտը մեծ ներուժ ունի և զարգացման հեռանկար:
Հայաստանում տեքստիլի և կոշկագործության ոլորտը զարգացնելու համար նախատեսվում է բացել կենտրոն, որը ոչ միայն կրթական նպատակ է ունենալու, այլ նաև ծառայություններ է մատուցելու:
«Մեր նպատակն է լինելու Հայաստանում զարգացնել տեքստիլի և կոշկագործության ոլորտը, որի հիմքը լինելու է միջազգային փորձը: Կենտրոնում հայ արտադրողներին կսովորեցնեն, թե ինչպես եվրոպական չափանիշներին համապատասխան կոշիկ կարել: Սա երկարաժամկետ գործընթաց է, սակայն միակ ճանապարհն է, որպեսզի Հայաստանը կարողանա պատրաստի այն չափանիշների կոշիկ, որն ընդունելի կլինի եվրոպական շուկայում»,- «Արմենպրես»-ի հետ զրույցում ընդգծեց Տրավիանին:
Կենտրոնը կմատուցի հագուստի և կոշիկի արտադրության պլանավորման և արտահանման խթանման, ֆինանսական կառավարման, հմտությունների զարգացման ծառայությունները:
ՄԱԿ-ի արդյունաբերության զարգացման կազմակերպության ծրագրի խմբի ղեկավարը նշեց, որ առանց Տնտեսական զարգացման և ներդրումների նախարարության աջակցության և հետաքրքրվածության չէին կարողանա ծրագիրը կյանքի կոչել:
«Մեր նպատակն է, որ այս ծրագրի իրակնացումը հետագայում ոլորտի զարգացման հիմք հանդիսանա, ուստի նախարարության աջակցությունը մեզ համար շատ կարևոր էր»,- ասաց Տրավիանին:
Կենտրոնում կներդրվեն հատուկ սարքավորումներ, որոնցից կօգտվեն կոշիկ արտադրող ընկերությունները, ինչը նույնպես կարող է նպաստել ոլորտի զարգացմանը:
Կենտրոնը նախատեսվում է բացել սույն թվականի սեպտեմբերին:
