Տպել
Սևանա լճի ափամերձ ու ջրածածկման վտանգի տակ հայտնված անտառային տարածքներում այս տարվա ընթացքում անտառմաքրման աշխատանքներ իրականացվել են 10 հեկտարի վրա: Ինչպես «Արմենպրես»-ին տեղեկացրեց «Սևան Ազգային պարկ» ՊՈԱԿ տնօրեն Վահե Գուլանյանը, մաքրման աշխատանքները մեկնարկել են այս տարվա մայիսից, «Սևան Ազգային պարկ» ՊՈԱԿ և ֆիզիկական անձանց միջև անտառմաքրման նպատակներով կնքված պայմանագրերի շրջանակներում:
«Ֆիզիկական անձանց ուժերով անտառմաքրման աշխատանքներ իրականացվել են Նորատուսի և Մարտունու մասնաճյուղերում: Հուլիսի վերջերի դրությամբ 5 հեկտար անտառային տարածք ծառերից, արմատներից ու այլ բույսերից մաքրվել է Նորատուսի, 5 հեկտար՝ Մարտունու մասնաճյուղերին պատկանող տարածներում: Մինչև տարեվերջ նույն տեղերում կիրականացվեն նույն ծավալների անտառմաքրման աշխատանքներ»,-ներկայացրեց Վահե Գուլանյանը, հավելելով, որ անտառմաքրման ներկա տեմպերը մնում են անբավարար:
«Ներկա պահին զգացվում է մոտ 200 հեկտար անտառային տարածքի հրատապ մաքրման կարիք: Մեր ուժերով մենք ի վիճակի ենք մաքրել մինչև 20 հեկտար: Մնացածը պետք է կատարվի պետբյուջեի միջոցների հաշվին, որտեղից համապատասխան հատկացումներ այս տարի դեռևս չի արվել: Ֆինանսական միջոցների հատկացման դեպքում հնարավոր կլինի գոնե կիսով չափ անտառմաքրման աշխատանքները մինչև տարեվերջ հասցնել ավարտի»,-հավաստեց «Սևան Ազգային պարկ» ՊՈԱԿ տնօրենը:
Խոսրով Խլղաթյան
