Տպել
Երևանում 2019թ–ի հունվարին տրանսպորտային կոլապս կլինի։ Այսօր հրավիրված ասուլիսի ժամանակ այս կանխատեսումն արեց Փոխադրողների միության նախագահ Հրանտ Եղիազարյանը։
«Հունվարի 1–ից 117 միկրոավտոբուսների շահագործման ժամկետը կավարտվի, դրանք պետք է դուրս գան գործածությունից։ Նշանակում է, որ մեքենաների պակաս կզգացվի երթուղային տաքսիների մոտ 10 գծերում։ Ուղևորները ստիպված կլինեն տրանսպորտի սպասել ոչ թե 15-20 րոպե, այլ կես ժամ և ավելի», – ասաց նա։
Եղիազարյանը խորհուրդ տվեց Հայաստանի մայրաքաղաքի բնակիչներին աղոթել, որ ձմռանը տեղումներ չլինեն։ Նրա կարծիքով` ձյան դեպքում միկրոավտոբուսներով երթևեկելը վտանգավոր կլինի ուղևորների կյանքի համար, քանի որ ոչ բոլոր մեքենաներն ունեն ձմեռային անվադողեր։
«Նոր իշխանությունները խոստանում են տրանսպորտային խնդիրը լուծել 2-4 տարվա ընթացքում, բայց դա չափազանց մեծ ժամկետ է։ Ավելին, արդեն ծախսվել է 850 հազար եվրո` ավելի արդյունավետ համակարգ ստեղծելու վերաբերյալ խորհրդատվությունների համար, և եթե նախագիծը չսկսեն իրականացնել շտապ կարգով, ապա դա անօգուտ կլինի», – նշեց Եղիազարյանը։
Նա ավելացրեց, որ այդ հարցով դիմել է Հայաստանի վարչապետի պաշտոնակատար Նիկոլ Փաշինյանին և Երևանի քաղաքապետ Հայկ Մարությանին, բայց ապարդյուն։
Եղիազարյանը համոզված է, որ մայրաքաղաքի բնակիչները շուտով կդիմեն այն միջոցին, որը նրանց սովորեցրել է հենց Փաշինյանը, այսինքն ցույց կկազմակերպեն քաղաքապետարանի մոտ` պահանջելով բարեփոխել տրանսպորտային համակարգը։
Sputnik Արմենիայի թղթակիցը փորձեց կապ հաստատել Երևանի քաղաքապետարանի տրանսպորտային վարչության պետ Հենրիխ Նավասարդյանի հետ` այդ հարցը պարզելու համար։ Սակայն քաղաքապետարանից հայտնեցին` Նավասարդյանը խորհրդակցության է, որը երկար կտևի։
Նշենք, որ Երևանի քաղաքապետ Հայկ Մարությանը դեռ նախընտրական քարոզարշավի ընթացքում խոստացել էր միասնական տոմսի համակարգ ներմուծել հասարակական տրանսպորտի բոլոր ձևերի համար, ներկրել ավտոբուսների տարբեր տեսակներ, կառուցել մետրոյի ևս մեկ կայարան։ Բացի այդ, նրա կարծիքով` հասարակական տրանսպորտը պետք է աշխատի մինչև կեսգիշեր։ Նա հայտարարել էր, որ գիշերային ժամերին պետք է մի քանի երթուղիներ թողնել քաղաքի գլխավոր մայրուղիներում։
