Տպել
ԱԺ նախագահի տեղակալ Վահե Էնֆիաջյանը ֆեյսբուքյան իր էջում անդրադարձել է Ազգային ժողովում աշխատող մաքրուհիների աշխատավարձերի կրճատման խնդրին.
«Ինչպեսև տեղեկացրել էի, հետևողական եմ վերջին օրերին ԱԺ մաքրության ոլորտի աշխատակիցների բարձրացված խնդրին:
Չնայած այն փաստին, որ իմ լիազորությունների մեջ չի մտնում հարցի կարգավորումը, այնուամենայնիվ, քաղաքացիներն ունեն դժգոհություններ, որոնց հարկավոր է արձագանքել և օգտակար լինել:
Երեկ ԱԺ աշխատակազմի ղեկավար-գլխավոր քարտուղար պրն. Տիգրան Գալստյանին դիմել եմ գրությամբ` վերջինիս ուշադրությունը հրավիրելով բարձրացված խնդրի և դրա համակողմանի ուսումնասիրմանը:
Ակնհայտ է, որ սոցիալական դժվարություններ հաղթահարող աշխատակիցների աշխատանքային հարաբերությունները պետք է լինեն առավելագույն շիտակ, բոլոր կողմերի համար հասկանալի և ընդունելի, իսկ ամենակարևորը` պետք է պահպանվի օրենքի և արդարության սկզբունքը»:
Հիշեցնենք, որ երեկ Վահե Էնֆիաջյանը մաքրուհիներին խոստացել էր խնդիրը ներկայացնել ԱԺ նախագահին ու աշխատակազմի ղեկավարին և գտնել լուծման տարբերակներ:
Հիշեցնենք, որ մարտի 22-ից ԱԺ-ում աշխատող մաքրուհիները բողոքում են իրենց աշխատավարձերի կրճատման համար:
