Տպել
Պատմաբան Վահրամ Թոքմաջյանը ֆեյսբուքյան իր էջում գրել է.
«Ինչու՞ եկանք այս հանգրվանին.
Բնակչության ու հատկապես իշխող կուսակցության շատ անդամների մոտ կարծիք էր ձևավորվել, թե հեղափոխությունն ավարտվում է իշխանափոխությամբ և ընտրություններով: Դրանից հետո կարելի է ձեռքերը ծալած նստել ու սպասել արդյունքների: Որևէ հեղափոխության կամ նմանատիպ գործընթաց չի ունեցել հեշտ արդյունք:
Փաշինյանի նշանակած կադրերից շատերը, և առաջնապես Արդարադատության նախարար Արտակ Զեյնալյանը, հեղափոխության կրող չեն: Նրանցից ոմանք կոմֆորմիստներ են. սովոր են աշխատել յոլա գնալու սկզբունքով: Թե՛ գործադիր, թե՛ օրենսդիր մարմիններում կան մարդիկ, որոնք խորը թմբիրի և վայելքի մեջ են: Նրանք համարում են, որ իրենց գործը կատարել են, սակայն իրականում, ոչինչ էլ չեն արել:
Հեղափոխությունը չի սիրում հապաղում: Հեղափոխությունը սիրում է ռիթմ, արագություն ու ոչ ճակատագրական, բայց անխուսափելի սխալներ: Կառավարությունը մեծ հաշվով հեղափոխական չէ: Միայն կառավարության ղեկավարն է հեղափոխական:
Հեղափոխությունը, ինչքան էլ չուզենք, պահանջում է հասարակարգի, համակարգերի, մշակույթի, խոսույթի և մոտեցումների ամբողջական փոփոխություններ: Հեղափոխությունները չեն արվում անձերի դեմ: Դրանք արվում են համակարգերի դեմ, որոնց սիմվոլիզացումը տեղի է ունենում անձերի միջոցով:
Երիցս նշել եմ ու շարունակելու եմ պնդել, որ Հայաստանում հեղափոխությունը չի ավարտվել ոչ նախորդ տարվա մայիսին, ոչ էլ առավել ևս՝ դեկտեմբերին: Ավելին, դեկտեմբերյան արդյունքներով ձևավորված ԱԺ-ով ու կառավարությունով այն հապաղել է:
Ուստի, ՀՀ-ում հեղափոխությունը դեռ շարունակվում է: Կամ մենք, որպես գիտակից հանրույթ, առանց բռնության ու լարումի, առանց թշնամանքի ու ճգնաժամի դուրս կգանք այս իրավիճակից պատվով կամ կկորցնենք պատմական պատեհությունը՝ մոտակա ժամանակներում ունենալ կուռ պետություն և պետականակառույց ազգ»:
