Տպել
SHAMSHYAN.com-ը ներկայացնում է տեսանյութ, որն արձանագրել է տեսախցիկը, թե ինչպես է Արմավիրի մարզում տեղի ունեցել Mercedes-ի վարորդի մասնակցությամբ խոշոր ավտովթարը։ Վիրավոր վարորդին ու նրա ուղևորին առաջինը օգնության էին հասել քաղաքացիները և վթարի հարևանությամբ գործող խանութի աշխատակիցները։ Ավելի վաղ հայտնել էինք, որ սեպտեմբերի 9-ին խոշոր ավտովթար էր տեղի ունեցել Արմավիրի մարզում: Ժամը 07:00-ի սահմաններում Աղավնատուն գյուղի բնակիչ՝ 51-ամյա Վարդան Ս.-ն իր վարած Mercedes մակնիշի 23 ՏՍ 883 համարանիշի ավտոմեքենայով Արշալույս գյուղի 1-ին փողոցում բախվել էր նույն գյուղի բնակիչ՝ 29-ամյա Հայկ Ա.-ին պատկանող ВАЗ 2106 մակնիշի 28 ՏԼ 538 համարանիշի ավտոմեքենային:
Ինչպես հայտնել էր ֆոտոլրագրողը, վթարի հետևանքով Mercedes-ի վարորդ Վարդան Ս.-ն և նրա ուղևոր՝ համագյուղացի, 54-ամյա Հայկազ Վ.-ն մարմնական վնասվածքներով տեղափոխվել էին Վաղարշապատ բժշկական կենտրոն: Վարորդին ու վիրավորին առաջինը օգնության էին հասել 06-ի վարորդն ու նրա հարազատները: Դեպքի վայր էին ժամանել ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ վաշտի հրամանատար Վահան Էվինյանի, դասակի հրամանատար Կարեն Աբելյանի գլխավորությամբ:
Վթարի մասին Երևանի ՃՈ օպերատիվ կառավարման կենտրոնի պատասխանատու հերթապահ Յուրա Հովհաննիսյանը տեղեկությունը փոխանցել էր ոստիկանության Վաղարշապատի բաժին, որտեղից ժամանել էր օպերատիվ խումբը՝ բաժնի պետի ժամանակավոր պաշտոնակատար Դավիթ Պետրոսյանի գլխավորությամբ:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
