Տպել
Ճապոնիայի առողջապահության նախարարությունը մտադիր է կիրառել մի հավելված, որը հնարավորություն կտա բացահայտել նոր տիպի կորոնավիրուսով վարակվածների շրջանակը:
«Արմենպրես»-ի հաղորդմամբ՝ այս մասին հայտնում է «ՌԻԱ Նովոստի»-ն:
Եթե մարդիկ մեկ մետր հեռավորությունից ավելի մոտ լինեն միմյանց 15 րոպե, սմարթֆոնների համար նախատեսված հավելվածը կարող է սքանավորել նմանատիպ հավելվածները, որոնք ներբեռնված են այլ սմարթֆոններում:
Հետագայում, եթե այդ անձանցից որևէ մեկի մոտ կորոնավիրուս հայտնաբերվի, և տվյալ անհատը դա նշի հավելվածում, ապա այն բոլոր մարդիկ, որոնք հաղորդակցվել են նրա հետ 14 օրվա ընթացքում հնարավոր վարակվածության մասին ծանուցում կստանան:
Մարդու անձնական կյանքի իրավունքը պահպանելու նպատակով բոլոր օգտատերերը միմյանց անհայտ կմնան: Եթե նրանցից որևէ մեկի մոտ մրսածության ախտանիշներ դրսևորվեն, հավելվածը նրա համար կընտրի մոտակայքում գտնվող մասնագիտացված բժշկական հաստատությունը:
Բացի այդ, Ճապոնիայում տարածում է գտնում QR-կոդի միջոցով վարակի մասին ծանուցում տարածելը: Այդ նորարարական նախաձեռնությանն աջակցել է Օսակա պրեֆեկտուրան: Հիմա այդ փորձը կիրառվում է Տոկիոյում և այլ քաղաքներում: Յուրաքանչյուր թանգարանի, ռեստորանի և այլ հաստատության տրվում է սեփական կոդը: Այցելուն այն սքանավորում է սմարթֆոնում և գրանցում է իր էլեկտրոնային փոստի հասցեն: Եթե պարզվում է, որ նրա հետ միևնույն ժամանակ տվյալ հաստատությունում կորոնավիրուսով վարակված մարդ է եղել, նա այդ մասին ծանուցում է ստանում իր էլեկտրոնային փոստին:
Այս համակարգն աշխատում է կամավորական սկզբունքով:
Առողջապահության համաշխարհային կազմակերպությունը մարտի 11-ին հայտնել էր նոր կորոնավիրուսային վարակի՝ COVID-19-ի բռնկման մասին: ԱՀԿ-ի վերջին տվյալներով աշխարհում արձանագրվել է վարակի ավելի քան 7 մլն դեպք: Մահացածների թիվն անցել է 428 հազարից:
Հայաստանում վերջին 24 ժամում արձանագրվել է նոր տիպի կորոնավիրուսի 723 նոր դեպք, մահացել է 6, բուժվել՝ 442 քաղաքացի։
Պատրաստեց Անժելա Համբարձումյանը
