Տպել
Տնտեսագետ Հովհաննես Ավետիսյանը ֆեյսբուքում գրել է.
«Կորզող համակարգի մասին շատ եմ խոսում ու քանի աչքներիս առաջ օրինակներ են բացվում` հետևյալն ասեմ:
Վերցնում ես մի ոլորտ, դարձնում լիցենզավորվող, իսկ լիցենզիայի վճարը ահռելի մեծ` ասենք մի քանի հարյուր միլիոն: Սրա արդյունքում շատերը դադարում են գործել, իսկ եղած մի քանիսին տալիս ես անօրինական գործելու հնարավորություն` կամ լիցենզիա չի ձեռքբերում, կամ էլ մասնակի, այսինքն «բիզնեսի» մի մասի համար դիմում և ստանում է լիցենզիա, իսկ մյուսի ոչ:
Իհարկե, սրա մասին պետական մարմիններում տեղյակ են լինում և իհարկե տեղեկանում են, թե ովքեր են հետևում և ինչու չպետք է մոտ գնան:
ԱԱԾ-ի, այսպես ասած, բացահայտումը իրականում այս պարզ սխեման է, որ բոլորին էր հայտնի և սրանք շարունակում էին/են գործել 2018-ից հետո: Սա է պատճառը, որ բազմիցս ասել եմ կորզող համակարգերը դեռ գործում են: Իսկ օլիգարխներին մեծահարուստ կարգելը, մեղմ ասած, սխալ էր:
Պատկերացրեք, որ այսօրվա քննարկման առարկա խաղատնային ոլորտը միակը չէ, դրանք շատ են և այդտեղ տարբեր շահերով մարդիկ են ներգրավված եղել և դեռ մնում են: Սրանց այլ կերպ օլիգարխ են անվանում:
Մի բան էլ ասեմ.
Ծառուկյան Գագիկը, վստահ եմ, կարծում է, որ այս ամենը իր հանդեպ արդար չէ: Ինչու՞: Որովհետև ինքը գիտի, որ նման տրամաբանությամբ «գործ անող» միայն ինքը չէ: Իսկ մյուսները շարունակում են իրենց լավ զգալ, իսկ ինքը ոչ: Այստեղ գալիս է նրա հետևյալ սխալը:
Նա շարունակեց մնալ քաղաքականության մեջ` մտածելով, որ ԱԺ-ում սեփական օգտագործման պատգամավորներ ունենալով ավելի պաշտպանված կլինի: Սակայն սա իհարկե մոլորություն էր, որովհետև, եթե ընտրել էր այս ճանապարհը, պետք է պատրաստ լիներ խելոք օգտագործվելու նոր իշխանությունների կողմից: Իսկ, եթե աչքդ հետ (անցյալ) գցես, բամփելու են գլխիդ, ինչը հիմա տեղի է ունենում:
Ես իհարկե կողջունեի օրինականության հաստատման և օլիգարխիայի վերացման (ոչ ֆիզիկապես, այլ համակարգը) կառավարության քայլերը, ավելին կարածացիս չափով կսատարեի, սակայն հիմա դեռ այդ գործընթացը չունենք:
Օլիգարխիկ համակարգի գործիքներից մեկը պատժվում է, միանշանակ արդարացի, սակայն ընդհանուր համատեքստում արդար չէ, երբ իր պես այլ գործիքներ շարունակում են վայելել «նոր Հայաստանը»:
Եթե այս մարդիկ, և համակարգը մաքրման գործընթացով չանցնեն, և շարունակեն մնալ գործիքներ օրվա իշխանությունների ձեռքում, ապա կորզող համակարգը շարունակելու է կենսունակ մնալ, իսկ պետությունը և մենք` հոռի շրջանում»:
