«Իրականում պաշտոնյաները եղել են Սև լճին մերձակա մեկ այլ՝ Սագի լճի կամ որ ավելի հավանական է՝ դրանից քիչ ներքևում գտնվող լճակի ափին՝ նկարվելու». Նաիրի Հոխիկյան

ՀՀ փոխվարչապետ Տիգրան Ավինյանը հպարտ կեցվածքով լուսանկար է հրապարակում՝ գրելով, թե գնացել է Սյունիքի Սև լիճ։ Այդ տարածքին ծանոթ յուրաքանչյուր մարդ, լուսանկարին նայելով, հասկանում է, որ ՀՀ խոշոր բնական լճերից մեկը չէր կարող այդքան փոքր տարածք ունենալ, բացի այդ, եթե թշնամին չի նահանջել և չի ազատել Սև լճի տարածքը, ինչպե՞ս է կարողացել փոխվարչապետը մարզպետի հետ հասնել լճի ափ։

Իրականում պաշտոնյաները եղել են Սև լճին մերձակա մեկ այլ՝ Սագի լճի կամ որ ավելի հավանական է՝ դրանից քիչ ներքևում գտնվող լճակի ափին՝ նկարվելու։ Դե հիմա, լիճը լիճ է, նկարում հո չի՞ երևա, թե որ լիճն է, կարևորը մարդկանց հերթական անգամ խաբեն։

Կից քարտեզում հստակ ցույց եմ տվել, թե որտեղ են եղել պաշտոնյաները, և բնական է, որ Սյունիքի մարզպետը կամ մյուս չինովնիկները չէին համարձակվի փոխվարչապետին հուշել՝ չանել ստահոդ հայտարարություններ։

Պարզապես ամոթալի երևույթ է, երբ մի ամբողջ երկրի ղեկավարությունը պաթոլոգիկ ստախոս է։

Հիմա որ ադրբեջանցիները իրենց հերթին նկարվեն ու իսկական Սև լճի մոտից նկարներ հրապարակեն, ի՞նչ եք ասելու։ Ձեզ իսկապե՞ս չի հետաքրքրում երկրի հեղինակությունը, թե՞ այդպես էլ մնացել եք նախադպրոցական տարիքի տրամաբանության մեջ։