Տպել
Մարդիկ եւ մրգային մլակները շատ քիչ ընդհանրություններ ունեն՝ առաջին հայացքից: Սակայն ուսումնասիրելով այս մլակներին՝ կարելի է ավելին իմանալ մարդու էության մասին, հատկապես, երբ խոսքը վերաբերում է դեպրեսիվ խանգարումներին: Հենց սրա հիման վրա են Մայնցի Յոհաննես Գուտենբերգի համալսարանի գիտնականները փորձում ավելի լավ հասկանալ դեպրեսիվանման վիճակները եւ դրանով իսկ բարելավել դրանց բուժման միջոցները: Հետազոտության արդյունքները հրապարակվել են Current Biology ամսագրում։
«Մենք ուսումնասիրել ենք ավանդական ասիական բժշկության, օրինակ այուրվեդեում, օգտագործվող բնական նյութերի ազդեցությունը մրգային մլակ-դրոզոֆիլների մոդելի վրա: Դրանցից որոշները կարող են հակադեպրեսային ներուժ ունենալ կամ կանխարգելիչ կերպով ուժեղացնել դիմադրությունը քրոնիկական սթրեսի նկատմամբ, այնպես որ դեպրեսիայի նման վիճակը կարող է նույնիսկ չզարգանալ»,- ասել է հետազոտության հեղինակներից մեկը՝ պրոֆեսոր Ռոլանդ Շտրաուսը:
Հետազոտողները մտադիր են, ի թիվս այլ բաների, ցուցադրել այդ նյութերի արդյունավետությունը, որոշել դրանց օպտիմալ բանաձեւերը եւ առանձնացնել իրական ակտիվ նյութերը մաքուր տեսքով՝ սկզբնական բուսական նյութից: Հետագայում դրանք շուկայում կարող են ներկայացվել որպես դեղամիջոցներ։
Բացի այդ, գիտնականները որոշել են ճանճերի գենոմում կենսադիմացկունության գործոններ փնտրել: Մարդկանց պես, մրգային մլակներն ունեն անհատական գենետիկական կառուցվածք՝ երկու միատեսակ ճանճեր չկան: Այդ իսկ պատճառով թիմը մտադիր է ուսումնասիրել, թե տարբերվում են արդյոք եւ ինչպես են տարբերվում ճանճերի գենոմները, որոնք ավելի լավ են կարողանում հաղթահարել սթրեսը, այն ճանճերի գենոմներից, որոնց մոտ դեպրեսիվ խանգարումը զարգանում է ի պատասխան կրկնվող թեթեւ սթրեսի:
Հույս կա, որ ապագայում հնարավոր կլինի մարդկանց մոտ ախտորոշել դեպրեսիայի գենետիկ հակվածությունը, այնուհետեւ բուժել այն բնական նյութերով, որոնք նույնպես հետազոտվում են նախագծի շրջանակներում:
