Տպել
UK Biobank նախագծի գիտնականները մշակել են մի քանի մոդելներ, որոնք կօգնեն կանխատեսել որոշ մահացու հիվանդություններ՝ հիմնվելով մարդու քայլվածքի վերլուծության վրա: Հիմնական նորարարությունը չափումների համար ամենապարզ և ամենաէժան սմարթֆոնների օգտագործումն է հատուկ սարքերի փոխարեն: Կանխատեսման ճշգրտությունը ներկայումս կազմում է 70%, իսկ կանխատեսման միջակայքը՝ առաջիկա հինգ տարին:
Գաղափարը նոր չէ, UK Biobank-ի փորձագետները երկար տարիներ տվյալներ են հավաքել մարդկանց կյանքի տարբեր գործոնների մասին, որպեսզի դրանք համեմատեն առողջության վերաբերյալ տեղեկատվության հետ և արդյունքում դուրս բերեն կարևոր օրինաչափություններ: Նախորդ ուսումնասիրություններում վաղաժամ մահվան անհատական ռիսկը կանխատեսելու համար օգտագործել են ֆիզիկական պատրաստվածության մակարդակը՝ ելնելով քայլվածքի թեստերի և քայլելու արագության գնահատականի արդյունքներից: Այս չափումները կենտրոնանում էին որակի, այլ ոչ թե քանակի վրա:
Նոր ուսումնասիրությանը մասնակցել է 100 000 մարդ, ովքեր 1 շաբաթվա ընթացքում կրում էին շարժման սենսորներ, որոնք գրանցում էին քայլելու ինտենսիվությունը: Ստացված տվյալների հիման վրա գիտնականները մշակել են քայլվածքի վերլուծության ալգորիթմներ, որոնք այժմ բարելավվում են՝ օգտագործողի համար ավելի հարմար եղանակով չափումները գրանցելու համար: Նորագույն մոդելին տվյալները հավաքագրելու համար պահանջվում է օրական ընդամենը 6 րոպե՝ մարդու վաղաժամ մահվան ռիսկը գնահատելու համար:
Գիտնականները կարծում են, որ իրենց մոդելները մեծ պահանջարկ կունենան, քանի որ մարդկանց մեծամասնությունը հաճախ ոչ ժամանակ ունի, ոչ էլ միջոցներ ժամանակին բուժզննում անցնելու համար։ Դրա հետ մեկտեղ այսօր զարգացած երկրների գրեթե յուրաքանչյուր բնակիչ ունի թեկուզ էժան սմարթֆոն, և հեռու չէ այն օրը, երբ այն կկարողանա զգուշացնել իր օգտատիրոջը վաղաժամ մահվան վտանգի մասին։
