Տպել
Ավետիք Իշխանյանի ֆեյսբուքյան էջից․
«ՆՈՐ ՍԱՐԴԱՐԱՊԱՏ
Հասկանու՞մ ենք, արդյոք, որ այս օրերին հայոց Արցախ ամրոցում որոշվում է ողջ Հայաստանի և հայ ժողովրդի հետագա ճակատագիրը։ Արցախի ժողովրդի տոկունությունից, համառությունից է կախված բոլորիս, այո՛ բոլորիս ճակատագիրը, լինենք մենք արցախաբնակ, հայաստանաբնակ, թե սփյուռքահայեր։ Արցախի , լեզուս չի պտտվում ասել․․․անկմանը, կհետևի Հայաստանի անկումը և ողջ հայ ժողովուրդը կդառնա պետականազուրկ ցեղ, արհամարհված բոլոր երկրների կողմից, որտեղ էլ կապաստանենք։ Կխճան և կարհամարհեն նաև ավանդական սփյուռքահայերին։
Այնպես որ Արցախի պայքարը պետք է վերածվի համազգայինի, ներառելով սփյուռքը, իհարկե, առաջին հերթին՝ Հայաստանը։ Ամեն վայրկյանը ճակատագրական է։ Միթե՞ չենք կարող մի կողմ դնել բոլոր տարաձայնությունները, մի պահ մոռանալ միմյանց հանդեպ նախկին վիրավորանքները, համախմբվել, ոտքի կանգնել, քշել ազգադավ իշխանությանը և փրկել հայոց աշխարհը։
Հասկացե՛ք վերջապես, այսօր հանուն Արցախի պայքարը, նույն 1918թ․ Սարդարապատն է և որոշվում է հայ ժողովրդի, հայոց պետականության լինել չլինելու հարցը»։
