Տպել
Հայաստանի կանանց 80 տոկոսը կայացնում է հիմնական գնումներ կատարելու վերաբերյալ որոշումը: Ինչպես տեղեկացնում է «Հայաստանի ժողովրդագրության և առողջապահության հարցերի հետազոտության կենտրոնը, 2015-16 թվականներ» զեկույցը, ամուսնացած կանանց 96 տոկոսը մասնակցում է սեփական առողջության պահպանման վերաբերյալ որոշման կայացմանը, իսկ 92 տոկոսը`իրենց ընտանիքին կամ բարեկամներին այցելելու որոշման կայացմանը:
«Չորս կանանցից երեքը մասնակցում են բոլոր երեք որոշումների կայացմանը, իսկ 2 տոկոսը չի մասնակցում երեք որոշումներից ոչ մեկին: Կանանց մասնակցությունը բոլոր երեք որոշումների կայացմանը փոփոխվում է ըստ մարզերի` կազմելով 47 տոկոս` Արարատում և 90 տոկոս` Արմավիրում»,- նշված է զեկույցում:
Ըստ զեկույցի` բոլոր երեք որոշումների կայացման մասնաբաժինը 2000 թվականի 50 տոկոսից աճել է մինչև 82 տոկոս (2010 թվական), սակայն 2015-16 թվականին մի փոքր նվազել է` կազմելով 77 տոկոս:
«Այն կանանց մասնաբաժինը, ովքեր չեն մասնակցում որոշումների կայացմանը, 2000 թվականի 14 տոկոսից 2015-16 թվականին կտրուկ նվազել է 2 տոկոսի»,- ասված է զեկույցում:
