Վարդանյանի սպանության մեջ մեղադրվողներից մեկը 24, մյուսը 22 տարվա ազատազրկման դատապարտվեց. armtimes.com
Advertisement 1000 x 90

Վարդանյանի սպանության մեջ մեղադրվողներից մեկը 24, մյուսը 22 տարվա ազատազրկման դատապարտվեց. armtimes.com

Աջափնյակ և Դավիթաշեն վարչական շրջանների ընդհանուր իրավասության դատարանում դատավոր Տաթևիկ Գրիգորյանի նախագահությամբ այսօր հրապարակվել է 2016 թ.-ի մարտին Սևանում դաժանաբար սպանված «Իրազեկ քաղաքացիների միավորում» ՀԿ փորձագետ Կարեն Վարդանյանի գործով դատավճիռը:

Այս գործով մեղադրյալներ ՝Գևորգ Զոհրաբյանն ու Արթուր Միհրանյանը մեղավոր են ճանաչվել ՀՀ քրեական օրենսգրքի 131-րդ հոդվածի 2-րդ մասի 1-ին կետերի (մարդուն առևանգելը), 104-րդ հոդվածի 2-րդ մասի 3-րդ, 7-րդ և 8-րդ կետերի  (սպանություն՝ զուգորդված մարդուն առևանգելով խմբի կողմից շահադիտական դրդումներով) և 177-րդ հոդվածի 2-րդ մասի 1-ին կետի (գողություն, որը կատարվել է մի խումբ անձանց կողմից) հատկանիշներով: Այսպիսով՝Գևորգ Զոհրաբյանը դատապարտել է 24 տարվա ազատազրկման և 1 միլիոն դրամ տուգանքի, իսկ Արթուր Միհրանյանը՝ 22 տարվա ազատազրկման և 1 միլիոն դրամ տուգանքի:

Այս մասին մեր զրույցում ասաց Միհրանյանի պաշտպան Մարինե Ֆարմանյանը: Մեր հարցին, թե բողոքարկելո՞ւ են դատավճիռը, պաշտպանն ասաց, որ պաշտպաններով պայքարում էին, որպեսզի Արթուր Միհրանյանը ցմահ ազատազրկման չդատապարտվի. պաշտպանյալի հետ քննարկելուց հետո կորոշեն բողոքարկելո՞ւ են դատվճիռը, թե՝ ոչ:

Մինչ դատավճռի հրապարակումը պաշտպանները հանդես են եկել ճառով: Գևորգ Զոհրաբյանը հրաժարվել է իր ճառից ինչպես նաև վերջին խոսքից, իսկ Արթուր Միհրանյանն իր ճառում միայն նշել է. «Բազմիցս նշել եմ՝ սպանությունը կատարել եմ ես, Գևորգը ոչ մի մեղք չունի»:

Համաձայն մեղադրական եզրակացության՝ Գևորգ Զոհրաբյանն ու Արթուր Միհրանյանը, նախնական համաձայնությամբ, խաբեության միջոցով գաղտնի առևանգել են Կարեն Վարդանյանին, ապօրինաբար զրկել կյանքից, որից հետո, նախնական համաձայնությամբ գաղտնի հափշտակել Կարեն Վարդանյանի զգալի չափի գույքը:

Քննության տվյալներով՝ Կարեն Վարդանյանն իր՝  Լենինգրադյան 31/8 շենքի 32-րդ հասցեի բնակարանը նվիրաբերել է 23-ամյա Գ.Զոհրաբյանին, որի դիմաց պետք է ստանար դրամական փոխհատուցում՝ 20.000 ԱՄՆ դոլարի չափով, կամ այդ գնի սահմաններում նոր բնակարան։

Պայմանավորված գումարը Կարեն Վարդանյանին չտալու համար Զոհրաբյանն առաջարկել է նրան Վրաստանի միջոցով մեկնել Դուբայ՝ շրջագայության՝ մտադրվելով Վրաստան ուղեկցելու ճանապարհին սպանել նրան։ Նշված մտադրության մասին Գ.Զոհրաբյանը հայտնել է 1973թ. ծնված Ա.Միհրանյանին, ով 2016թ. հունվար ամսից օրավարձով վարում է Գ.Զոհրաբյանին պատկանող «Օպել Վեկտրա Բ» մակնիշի ավտոմեքենան՝ խոստանալով դրա դիմաց որոշակի գումար:

Պայմանավորվածության համաձայն՝ Ա.Միհրանյանը 2016թ. մարտի 17-ին Լենինգրադյան փողոցում գտնվող դեղատնից գնել է «Դիմեդրոլ» տեսակի թվով 5 դեղահաբ, դրանք լցրել ջրով լի շշի մեջ և դրել ավտոմեքենայի հետնամասում, որպեսզի Կ.Վարդանյանը ճանապարհին այն խմի և քնի, ապա երեքով «Օպել Վեկտրա Բ» մակնիշի ավտոմեքենայով ուղևորվել են դեպի Սևան քաղաք՝ Կ.Վարդանյանին Վրաստանի Հանրապետություն ուղեկցելու պատրվակով:

Ճանապարհին Կ.Վարդանյանը խմել է դեղահաբերով ջուրը, սակայն այն որևէ ներգործություն չի ունեցել։ Հասնելով Սևանի Ախթամար կղզու մոտ՝ ավտոմեքենան կանգնեցրել են բնական կարիքները հոգալու պատրվակով։ Նախնական տվյալներով՝ գետնից քար վերցնելով, Գ.Զոհրաբյանը վերադարձել է, ավտոմեքենայում նստել Կ.Վարդանյանի կողքին և քարով հարվածներ հասցրել նրա գլխին:

Վերջինիս հարվածել է նաև ավտոմեքենայի վարորդը՝ Ա.Միհրանյանը։ Տեսնելով անշնչացած Կ.Վարդանյանին և հասկանալով, որ նա արդեն մահացել է՝ նրան թողել են ավտոմեքենայի սրահի հետնամասում, վերադարձել Երևան, որտեղ դիակը տեղափոխել են Գ.Զոհրաբյանին պատկանող ավտոտնակ և թաղել։

armtimes.com