Տպել
Գյումրու «Երեխաների տուն» մանկատունը նվեր ստացավ միկրոավտոբուս: Այնքան անհրաժեշտ նվերը մանկատան համար պատրաստել էր «Հայաստան» համահայկական հիմնադրամը:
Մանկատան տնօրեն Աննա Գևորգյանի խոսքով՝ միկրոավտոբուսի անհրաժեշտությունն իրենք ամեն օր զգում էին:
«Մենք երեխաներին պարբերաբար տանում ենք Երևան՝ բուժզննումների, վիրահատությունների, հաճախ կարիք է լինում երեխաներին զբոսանքի կամ որևէ միջոցառման տանել։ Փոքր մեքենաներով չենք կարողանում բոլորին տեղափոխել։ Բացառապես բոլոր երեխաները մշտական դայակի հոգածության կարիք ունեն, այդ պատճառով տարողունակ միկրոավտոբուսը մեզ շատ օգտակար կլինի»,- նշեց տնօրենը։
Միկրոավտուբուսի գնումը ֆինանսավորել են «Հայաստան» համահայկական հիմնադրամի արգենտինահայ բարերարներ Էքսերճիէան, Դեվեճիէան, Շիմշիրօղլու ընտանիքները։
Ինչպես տեղեկացրին «Հայաստան» համահայկական հիմնադրամից, սա հիմնադրամի հերթական աջակցությունն էր «Երեխաների տուն» մանկատանը։ Հիմնադրամի Գերմանիայի տեղական մարմնի ֆինանսավորմամբ բարենորոգվել են մանկատան երկու շենքերը, վերակառուցվել է խաղահրապարակը։ Անհրաժեշտ միջոցների մեծ մասը հավաքագրվել էր Հիմնադրամի բարերարներ Համո և Թամար Գրիգորյաններ ընտանիքի նվիրատվություններից և համաեվրոպական «Հեռախոսամարաթոն 2011»-ին հավաքագրված գումարից:
Շվեյցարիայի տեղական մարմնի ֆինանսավորմամբ մանկատանը կառուցվել է թերապևտիկ նշանակության փակ լողավազան, հիմնվել բուժլաբորատորիա և ախտորոշիչ սենյակ: Հիմնադրամի արգենտինահայ բարերարներ Դեվեճիէան, Էքսերճիէան և Շիմշիրօղլու ընտանիքների միջոցներով լաբորատորիային նվիրաբերվել է ուլտրաձայնային հետազոտության ժամանակակից սարք: Այս տարվա հունիսին Հիմնադրամը HSBC բանկի ֆինանսավորմամբ մանկատանը ավելի քան 2.2 միլիոն դրամի սարքավորումներ է նվիրել՝ քայլակներ, սայլակներ, մկանները մարզող և մերսող սարքեր, օրթոպեդիկ բարձեր, ֆիքսատորներ:
Հայաստանում առանց ծնողական խնամքի հաշմանդամություն ունեցող մանկահասակ երեխաների համար միայն մեկ մասնագիտացված կենտրոն կա: Գյումրիի «Երեխաների տուն» մանկատանն ամբողջ Հայաստանից ֆիզիկական և մտավոր խնդիրներ ունեցող 127 երեխա կա՝ նորածնից մինչև 8 տարեկան։
«Հայաստան» համահայկական հիմնադրամն իր մշտական հոգածության ներքո է պահում մանկատունը, բազմակողմանի աջակցում 2012-ից մինչ օրս՝ վերանորոգում իրականացնելով, բուժական լաբորատորիա, լողավազան կառուցելով, անհրաժեշտ տարբեր սարքավորումներ ու իրեր նվիրաբերելով և այլն:
