Գրքի երևանյան փառատոնին ներկայացված է նաև ապրիլյան հերոս Բագրատ Ալեքսանյանի գիրքը

Հայաստանում առաջին անգամ անցկացվող Գրքի երևանյան փառատոնին (Yerevan Book Fest)  հայ մեծանուն գրողների ստեղծագործությունների կողքին ներկայացված է նաեւ ապրիլյան պատերազմի հերոս, Ջրականում (Ջաբրայիլ) զոհված Բագրատ Ալեքսանյանի «Վերադարձ» խորագիրը կրող ժողովածուն: Գիրքը վերջերս վերահրատակվել էր եւ հասանելի է 300 օրինակով:

Հերոսի մայրը՝ Նարինե Ասրյանը, եւս ներկա էր փառատոնի բացման արարողությանը: Նա նշեց, որ որդու գրքի հրատարակումն իր համար կարեւոր իրադարձություն է:

«Այն ինձ համար մեծ նշանակություն ունի: Գրքում նկարագրված են ոչ թե հորինվածքներ, այլ կյանքից վերցրած պատմություններ,  ամեն  տողն ու բառը իրական են: Բագրատս գրել է հայրենիքի, ընտանիքի եւ շատ ու շատ այլ թեմաներով: Նրա շատ գրվածքներ, կարելի է ասել, կենդանի հնչյուն են: Այս գրքով, իհարկե, կարոտս  չի փարատվում, բայց այն ինձ համար շունչ է, իմ սրտի մի մասնիկը, ու եթե  ինչ-որ մեկին այն  նվիրում եմ, ասում եմ՝ համարեք, որ սա իմ սիրտն է, այնպես արեք, որ չվնասվի:  Ու ինձ համար անչափ մեծ հպարտություն է նրա գիրքն այստեղ տեսնել, որովհետեւ նա միշտ ցանկացել է, որ իր ստեղծագործությունները հրատարակվեն: Նրա երազանքը կատարվել է»,- «Արմենպրես»-ի հետ զրույցում ասաց նա:

Նոյեմբերի 24-ին տեղի ունեցավ Գրքի երևանյան փառատոնի (Yerevan Book Fest) բացման արարողությունը: Փառատոնի նպատակը հայ ժամանակակից գրականությունն ընթերցողին ավելի ճանաչելի եւ ընդունելի, նոր հրատարակությունների մասին տեղեկատվությունն  ավելի հասանելի  դարձնելն է: