Տպել
Դեկտեմբերի 11-ի երեկոյան ֆեյսբուքում հայտնվեց այս գրառումն՝ արված «Շողակն» ԲՀԿ-ի կողմից. Լուսանկարի ճշտության վերաբերյալ կասկածներս հաստատվեցին, երբ այն գտա դեռ 2016-ի ապրիլին ադրբեջանական մամուլի հրապարակած նյութերում՝ իբր այս տղաները հայոց բանակի զինվորներ են և գտնվում են ծանր կացության մեջ:
Մինչ ադրբեջանական մամուլի՝ այս լուսանկարը տարածելը, այն համացանցում էր հայտնվել 2014-ին stopfake.org կայքի հրապարակման մեջ: Իրականում, լուսանկարում պատկերված են ռուս զինվորներ, որոնք անցնում են հատուկ ռազմական պարապմունքներ՝ խիստ եղանակային պայմաններում գոյատևել սովորելու համար: Լուսանկարն արվել է ավելի քան 5 տարի առաջ: Փորձեցի «Շողակն» ԲՀԿ-ի հետ պարզաբանել, թե ինչու է իրենց էջում տեղադրված հենց այս նկարը: Անձնական նամակով իրենց տեղեկացրեցի, որ լուսանկարը չի համապատասխանում իրականությանը, և որ այն կարող է խուճապ առաջացնել մարդկանց մեջ: Լուսանկարը հեռացնելու իմ կոչը հաշվի չառնվեց, փոխարենն ինձ պատասխանեցին, որ այդ ամենը համաձայնեցված է Պաշտպանության նախարարության հետ:
Գրառման տակ մեկ այլ օգտատերի հարցին, թե ինչ կապ ունի լուսանկարը հայոց բանակի հետ, «Շողակն» ԲՀԿ-ն պատասխանեց, թե լուսանկարն արել և իրենց ուղարկել են հենց Օմարի լեռնանցքում ծառայող զինվորականները: Որոշ օգտատերերի բողոքներից հետո ՀՀ ՊՆ մամլո խոսնակ Արծրուն Հովհաննիսյանն իր ֆեյսբուքյան էջում արեց հետևյալ գրառումը.
Ինձ մտերիմ մարդկանցից մեկը զանգահարեց «Շողակն» ԲՀԿ-ի նշած հեռախոսահամարով՝ փորձելով ճշտել, թե ինչպես և ինչ են հավաքագրում զինվորների համար: «Շողակն» ԲՀԿ-ի տնօրեն Նաիրա Պետրոսյանը պատասխանեց, որ հավաքում են բրդյա գործվածքներ, գուլպաներ, քնապարկեր, տակաշորեր, ձեռնոցներ, ծածկոցներ և սագի յուղ: Իր խոսքերով՝ հավաքել սկսել են զինվորների ահազանգից հետո: Ահազանգը եղել է ոչ միայն իրենց կազմակերպությանը: Զինվորները օգնություն են խնդրել նաև այլ կազմակերպություններից: Նաիրան ասաց, որ կարող են տանել այնքան հագուստ, որքան կբերեն իրենց կենտրոն: «Մենք պայմանավորվածություն ունենք ՊՆ-ի հետ, հագուստները տանում են ԱԻՆ-ի մեքենաները, օգնում են նաև ՋԻՋԻ տաքսիները»: ՀՀ ՊՆ թեժ գիծ զանգահարեցի, որտեղ հաստատեցին Արծրուն Հովհաննիսյանի խոսքերն՝ ասելով, որ հայ զինվորն ապահովված է ամեն ինչով, և որ ոչ մի համաձայնագիր կամ պայմանավորվածություն ՀՀ ՊՆ-ի հետ «Շողակն» ԲՀԿ-ն չունի: Նրանք տեղյակ չեն նման կազմակերպության գործունեությունից: Զրուցեցի նաև մի զինվորի հետ, որը մարտական ծառայություն է անցնում այդ տարածքում: Նա ծիծաղելով ասաց. «Նման բան չկա, մենք ամեն ինչով ապահովված ենք: Գուլպաների, քնապարկերի, ծածկոցների և առավել ևս սագի յուղի կարիք չկա: Հանգիստ եղեք»: «Շողակն» ԲՀԿ-ի մասին տեղեկությունները համացանցում կցկտուր էին: ՀՀ կառավարության էլեկտրոնային ռեգիստրում կազմակերպության՝ լուծարման գործընթացում գտնվելու կամ գործունեության դադարեցման մասին տեղեկություններ գրառված չեն: Բայց այն հիմնադրվել է 2004 թվականի օգոստոսի 16-ին: Իսկ «Սփյուռ» տեղեկատվական համակարգում գրված է, որ կազմակերպությունը չի գործում 2007 թվականից ի վեր: «Շողակն» ԲՀԿ-ի գրառումը արդեն հասցրել են տարածել մի շարք կայքեր:
