Տպել
Այսօր՝ մարտի 30-ին, խոշոր ավտովթար է տեղի ունեցել Արագածոտնի մարզում։ Ժամը 13։00-ի սահմաններում Աշտարակ քաղաքի բնակիչ՝ 51-ամյա Սարգիս Ս.-ն իր վարած Volkswagen մակնիշի 653 ՕՕ 63 համարանիշի ավտոմեքենայով Թալին քաղաքից դեպի Թաթուլ գյուղ ավտոճանապարհի 3-րդ կմ հատվածում դուրս է եկել ճանապարհի երթևեկելի գոտուց և կողաշրջված վիճակում հայտնվել դաշտում։
Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Սարգիս Ս.-ն մարմնական վնասվածքներով տեղափոխվել է Թալինի բժշկական կենտրոն։ Դեպքի վայր են ժամանել ճանապարհային ոստիկանության 2-րդ սպայական գումարտակի 2-րդ վաշտի ծառայողները՝ ավագ հետաքննիչ Էդգար Ավդալյանի գլխավորությամբ, ում կողմից փաստի առթիվ նյութեր են նախապատրաստվում։
Ֆոտոլրագրողի տեղեկություններով՝ նշված ավտոմեքենան հաշվառված է «Հայփոստ» ՓԲԸ-ի հաշվեկշռում, իսկ Սարգիս Ս.-ն էլ աշխատում է որպես ուղեկցող վարորդ և նշված ավտոմեքենայով Երևանից մի քանի գյուղեր էր տեղափոխում գյուղացիների թոշակները, և ոստիկանությունը ճշտում է՝ ավտոմեքենայում այդ պահին գումար եղել է, թե ոչ։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
