Տպել
Լոռու մարզի ընդհանուր իրավասության դատարանի վճռով՝ 44-ամյա տղամարդը վթարի գործով մեղավոր է ճանաչվել՝ դատապարտվելով 1 տարվա ազատազրկման, զրկվելով տրանսպորտային միջոցներ վարելու իրավունքից 2 տարի ժամկետով:
Տղամարդու նկատմամբ խափանման միջոց ընտրված ստորագրությունը չհեռանալու մասին թողնվել է անփոփոխ՝ մինչև դատավճռի օրինական ուժի մեջ մտնելը:
Տղամարդուն մեղադրանք է առաջադրվել այն բանի համար, որ նա, խախտել է «Ճանապարհային երթևեկության անվտանգության ապահովման մասին» օրենքի պահանջները, Ճանապարհային երթևեկության կանոնների պահանջները, որի հետևանքով ավտոմեքենան ճանապարհի շրջադարձին ենթարկվելով կողասահքի՝ դուրս է եկել հանդիպակաց երթևեկելի մաս և ընդհարվել հանդիպակաց ընթացող ավտոմեքենայի առջևի մասին, ինչի արդյունքում անզգուշությամբ առաջացրել է ուղևորի մահը, մյուս ուղևորի առողջությանն անզգուշությամբ պատճառվել է կյանքին վտանգ սպառնացող ծանր վնաս, ուղևորներից մյուսի առողջությանը պատճառվել են թեթև վնասի հատկանիշներ պարունակող մարմնական վնասվածքներ: Մյուս ավտոմեքենայի ուղևորներից մեկի առողջությանը պատճառվել է ծանր վնաս, մյուսի առողջությանը պատճառվել է թեթև վնասի հատկանիշներ չպարունակող մարմնական վնասվածքներ:
Մարմնական վնասվածքներ են ստացել նաև մյուս ավտոմեքենայի երկու ուղևորները:
Ըստ դատական ակտի՝ մինչ դատաքննությունը սկսելն ամբաստանյալը միջնորդել է դատական քննությունն անցկացնել արագացված կարգով և հայտարարել, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատաքննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը որոշում է կայացրել արագացված կարգով դատաքննություն անցկացնելու մասին:
