Տպել
Բացի «սևերի ու սպիտակների» մասին հայտարարությունը, Երևանի քաղաքապետի «Իմ քայլը» դաշինքի թեկնածու Հայկ Մարությանը թույլ է տվել մեկ այլ սխալական հայտարարություն ևս, սակայն դրան բարեկամաբար ենք վերաբերվում։ Այս մասին այսօր՝ սեպտեմբերի 7-ին լրագրողների հետ զրույցում հայտարարեց ավագանու ընտրություններում «Ժառանգություն» կուսակցության ցուցակի երկրորդ հորիզոնականում գտնվող Արմեն Մարտիրոսյանը։
«Մենք բոլորս մարդ ենք, ուստի և սխալական, որևէ մեկն անսխալական չէ: Դրական եմ համարում, որ Հայկ Մարությանն ընդունեց իր ասածի սխալականության մի մասը, բայց այնտեղ մի հատված կար, որը ևս պարզաբանման կարիք ուներ: Թեև այդ ժամանակն անցել է։ Ինչևէ, մենք առաջ ենք շարժվում, ոչ թե կենտրոնանում ենք ինչ-որ բանի վրա», -նշեց նա։
Մարտիրոսյանը սխալական համարեց այն արտահայտությունը, թե միայն ՔՊ-ում են հավաքված այն մարդիկ, որոնք ոչ միայն հեղափոխության ժամանակ, այլ դրանից առաջ են պայքարել, սակայն նշեց, որ դրան բարեկամաբար են վերաբերվում և առաջ շարժվում։
«Ցանկացած պարագայում մեր մոտեցումը հետևյալն է՝ չկան սևեր և սպիտակներ, կամ այլ գույներ, մեզ համար կան քաղաքացիներ, որոնք ունեն իրենց դիրքորոշումը», -հավելեց Մարտիրոսյանը:
«Ժառանգություն» կուսակցության ցուցակը գլխավորող մյուս անդամը՝ Հովսեփ Խուրշուդյանն էլ կարևորեց, որ Մարությանը նոր է մտնում քաղաքականություն. «Հայկ Մարությանը հայտնի է որպես ուրախ տղա, դրական դաշտում գտնվող մեկը, իր այդ հայտարարությունն ինձ խորթ թվաց, նա եթե վերադառնա իր բնական վիճակին, այն դաշտին, որտեղ գտնվել է, ավելի լավ կլինի։ Իր կերպարը դրական է և ես նրան շատ լավ եմ վերաբերում։ Եթե քաղաքականություն մտնելիս վրիպումներ է թույլ տալիս, ոչինչ, շատ կցավեի, եթե դա թիմի մտածողության խնդիր լինի»։
Կուսակցության քաղաքապետի թեկնածու Րաֆֆի Հովհաննիսյանն էլ իր հերթին շեշտեց «սևերի ու սպիտակների» եզրույթներով խոսելը պետության համար ոչ մի լավ բանի չի բերելու. «Եթե Ստալինը դիմացս լիներ և ասեր, որ ինքը սպիտակն է, մենք հպարտությամբ սևի գործառույթը կվերցնեինք մեզ վրա, որ ունենայինք նորմալ, ժողովրդավար երկիր»։
