Տպել
Ռոբերտ Մարգարյանի ֆեյսբուքյան վերլուծականը:
Սրանից ամիսներ առաջ մեկը մյուսի հետևից իրենց ստորագրությունները դնելով «Սասնա ծռեր» խմբի անդամների ազատության մեջ հայտնվելու հող նախապատրաստող հիմնականում «Ծառուկյան» դաշինքի անդամ պատգամավորները հավանաբար չէին ենթադրում, որ հիշյալ զինված խմբավորման անդամները ազատության մեջ հայտնվելուց հետո կուսակցություն հիմնելով ու «քաղաքական» գործունեություն ծավալելով փորձելու են դատա-իրավական ապահով պատնեշ ստեղծել իրենց շուրջ ու խույս տալ ոչ-հեռու անցյալում իրենց հանցագործ արարքի դիմաց պատասխանատվություն կրելուց ու համարժեք պատժի արժանանալուց:
Այսօր «Սասնա ծռեր»-ը քաղաքական կուսակցություն են, իսկ զինված խմբի անդամներն արդեն կուսակցությունը վարող քարտուղարության անդամներ և նրանց դեմ ցանկացած դատա-իրավական ակտ հիմք է տալու դա որակել, որպես քաղաքական կուսակցության ազատ գործունեության իրավունքի սահմանափակում: Ներկա իրավիճակում դժվար կարելի է ենթադրել, որ հիշյալ խմբի անդամներից որևէ մեկը առնվազն մոտ ապագայում կրելու է իր հանցագործ արարքի պատիժը:
Կարծում եմ ՊՊԾ գնդի գրավման ժամանակ զոհված ոստիկանների արյան դիմաց խղճի խայթ պիտի զգան ստորագրություններով «Սասնա ծռեր» խմբի անդամներին նման քաղաքական անձեռնմխելիություն շնորհած ԱԺ պատգամավորները: Թեև չեմ բացառում, որ տրված ստորագրությունների համար այսօր առաջինը զղջում են հենց «Ծառուկյան» դաշինքի անդամները, հատկապես որ դատելով Երևանի ավագանու ընտրություններում արձանագրված արդյունքներից նրանց չհաջողվեց հետհեղափոխական էյֆորիայի մթնոլորտում, զինված խմբի անդամների ազատության համար հող պատրաստելու հաշվին շահել հիշյալ խմբի «հեղափոխական» համախոհների համակրանքն ու ձայները:
«Սասնա ծռեր»-ի հետագա ծառայություններից նաև օգտվելու են գործող իշխանությունները: Կասկած չկա որ «Սասնա ծռեր» կուսակցությունը հանդես է գալու ոչ թե ընդդիմադիր, այլ իշխանության կողքին կանգնած ու նրա նպատակներին ծառայող խմբավորման դերում, որն ի դեպ ունի սեփական ժողովրդի դեմ զենք կիրառելու, պատանդառության ու բռնի ուժի գործադրման, նաև իր գործողությունները տարբեր ազգային ու հայրենասիրական կարգախոսներով արդարացնելու մեծ փորձ: Զինված խմբավորումից քաղաքական կուսակցության կերպարանախոխված խումբը ցանկացած պահին, պայմանների անհրաժեշտությունից ելնելով ընդունակ է վերականգնելու իր իսկական ու նախկին դիմագիծը (հատկապես որ հիշյալ խմբի ղեկավար դեմքերն իրենց տարբեր հարցազրույցներում չեն բացառել կրկին զենքի դիմելու հնարավորությունը), այն տարբերությամբ, որ եթե դա նախկինում ուղղված էր իշխանության դեմ, այսօր դա ծառայելու է իշխանության նպատակների իրագործմանը:
Միանձնյա իշխանության ձգտող և հարցերը հրապարակներում, ժողովրդի ծափերի ներքո ու ժողովրդի ցանկության անվան ներքո լուծող համակարգերին բնորոշ է իրենց կողքին ունենալ քաղաքական քողի ներքո ծպտված զինված խմբավորում, որը ցանկացած ժամանակ կարող է հօգուտ իշխանության շահերի ասպարեզ իջնել և հանուն գործող իշխանությունների ցանկության իրագործման ճնշել ցանկացած ընդդիմադիր ձայն: Հիշյալ խմբավորումների առանձնահատկություններից մեկն այն է, որ նրանք իշխանությանը սատարող իրենց գործողություններում չունեն իրավապահ մարմիններին յուրահատուկ իրավական ու օրինական սահմանափակումները և միևնույն ժամանակ նրանց ծառայություններից օգտվող իշխանությունները նրանց գործողությունների դիմաց որևէ պատասխանատվություն չեն ստանձնում:
Այսօր Հայաստանում ձևավորվող ներքաղաքական գործընթացների ֆոնին չափազանց մեծ է «Սասնա ծռեր»-ին նման գործառույթ վերապահված լինելու հնարավորությունը:
