Հրաչյա Հարությունյանն ազատ է արձակվել. նա տաքսի է վարում

Ռուսաստանում ավտովթարի համար դատապարտված վարորդ Հրաչյա Հարությունյանը հայրենիքում պատիժը բաց ռեժիմով կրելու ընթացքում տաքսի էր վարում։ Sputnik. Ռուսաստանում ավտովթարի հետևանքով դատապարտված և պատիժը կրելու համար Հայաստան տեղափոխված վարորդ Հրաչյա Հարությունյանն այսօր՝ նոյեմբերի 6-ին, համաներմամբ ազատ է արձակվել։
Համաներումը մեծ է, բայց ոչ համընդհանուր
Այս մասին Sputnik Արմենիային հայտնեց Հարությունյանի աները` Վիկտոր Մարտիրոսյանը։

Նա նշեց, որ իր փեսային պատժի կրումից ազատելու հարցով ինքը դիմումներ էր ներկայացրել դեռ նախորդ իշխանություններին, այդ թվում` Սերժ Սարգսյանին։

Հարցին, թե ինչով է այժմ զբաղվում Հրաչյա Հարությունյանը, մեր զրուցակիցը պատասխանեց՝ «տաքսի է քշում»։

Հիշեցնենք, 2013թ. հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղևորատար ավտոբուսին, ինչի հետեւանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել: Նա Ռուսաստանում 6 տարի 9 ամիս ժամկետով ազատազրկման էր դատապարտվել:

2017թ. հուլիսի 20-ին Հրաչյա Հարությունյանը տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը կրելու համար։

Ավելի ուշ դատարանը որոշում կայացրեց պատժի կրումն ազատ ռեժիմով շարունակելու վերաբերյալ` հաշվի առնելով այն հանգամանքը, որ վերջինը ընտանիքի միակ կերակրողն է։