Տպել
Android Authority-ն ամփոփել է տարին՝ նշելով բոլոր այն սմարթֆոնները, որոնք արժանի են լավագույնի կոչմանը:
Փորձագետները գնահատել են սմարթֆոնների ձայնը, տեսախցիկը, մարտկոցի աշխատանքը և այլն:
Լավագույն սմարթֆոնը
Հաղթողը՝ Samsung Galaxy Note 9
Հաղթողն ընտրվել է բոլոր թեստերի արդյունքների հիման վրա: Հաշվի է առնվել ամեն ինչ՝ սմարթֆոնի անտաքին տեսքից՝ մինչ լուսանկարներ:
Կարևոր է, որ սմարթֆոնը լինի լավագույնը՝ բոլոր հատկանիշներով: Samsung Galaxy Note 9-ը չի տապալել ոչ մի թեստ:
Սմարթֆոնների լավագույն նորարարությունները
Եթե սմարթֆոնի այս կամ այն գործառույթի աշխատանքը գնահատելը հեշտ է, ապա ավելի բարդ է հասկանալ, թե որոնք են լավագույն նորարարությունները: Այդ իսկ պատճառով, հարթակն անցկացրել է հարցում՝ առաջարկելով իր տարբերակները, ինչպես նաև հաշվի առնելով լավագույն նորարարությունների՝ օգտատերերի առաջարկած տարբերակները: Արդյունքում՝ նշվել է 3 նորարարական գործառույթներ, որոնք ճանաչվել են լավագույնն այս տարի:
Duplex-ը՝ Google-ից
Սա արհեստական ինտելեկտի վրա հիմնված տեխնոլոգիա է, որը թույլ է տալիս ձայնային օգնականին զանգահարել սրճարաններ՝ սեղաններ ամրագրելու համար, տոմս գնել և, օրինակ, պատվիրել պիցցա:
Ծալվող սարքեր՝ Samsung-ից և Royole-ից
Խոսքը Samsung-ի ծալվող սմարթֆոնի՝ FlexPai-ի մասին է, որի ներկայացման համար այս տարի ընկերությունը կազմակերպել էր հատուկ ցուցադրություն:
Դիսփլեյում տեղադրված է մատնահետքի սկաներ՝ Vivo-ից
Android Authority-ի փորձագետների կարծիքով՝ այս տեխնոլոգիան առաջին քայլն է, որը թույլ է տալու հետագայում ունենալ մատնահետքի սկաներ, որը կճանաչի մատնահետքը էկրանի ցանկացած հատվածում:
Լավագույն դիսփլեյը
Հաղթողները՝ Samsung Galaxy Note 9 և Razer Phone 2
Այս անվանակարգում հաղթողին որոշելու համար հրավիրվել են մասնագետներ Spectracal-ից, ովքեր գնահատել են դիսփլեյի բոլոր հատկանիշները:
Բոլոր հատկանիշների համադրմամբ՝ լավագույնն է ճանաչվել Samsung Galaxy Note 9-ը: Huawei Mate 20 Pro-ն և Samsung Galaxy S9-ը մի փոքր են զիջում այդ սմարթֆոնին:
Մասնագետները նշել են նաև լավագույն դիսփլեյը խաղերի համար: Այս անվանակարգում բացարձակ առաջատարը Razer Phone 2-ն է:
Լավագույն ձայնը
Հաղթողը՝ LG V40 ThinQ
Այս անվանակարգում հաղթողին որոշել են SoundGuys-ի մասնագետները: Նրանք շատ տարբեր թեստեր են անցկացրել` գնահատելով բարձրորակ ձայնի ամենատարբեր բաղադրիչները: Բոլոր թեստերի համադրությամբ լավագույնն է ճանաչվել LG V40 ThinQ-ը, որն ունի 32-բիթ Hi-Fi-DAC և հզոր ձայն:
Բացի դրանից, լավագույնն են համարվել նաև Asus ROG Phone, Nokia 7.1 և Samsung Galaxy S9 + սմարթֆոնները: The RED Hydrogen One, Huawei P20 և Huawei P20 Pro սմարթֆոններն արժանացել են ձայնի որակի բացասական գնահատականի:
Լավագույն մարտկոցը
Հաղթողները՝ Huawei P20 Pro և Huawei Mate 20 Pro
Այս անվանակարգում ևս անցկացվել են շատ հետազոտություններ, սակայն մեծ ուշադրությոն է դարձվել նրան, թե որքան արագ է լիցքավորվում սմարթֆոնի մարտկոցը, և որքան երկար է էներգիան պահպանվում:
Հաղթող է ճանաչվել Huawei Mate 20 Pro-ն, որն ընդամենը 15 րոպեում լիցքավորվում է 40%, 30 րոպեում՝ 76%, իսկ մեկ ժամում` 99%:
Լավագույն տեսախցիկ
Հաղթողները՝ Samsung Galaxy Note 9 և Pixel 3/3 XL
Այս անվանակարգում գնահատվել են սմարթֆոնների տեսախցիկների դասական հատկանիշները, ինչպես նաև նորարարական լուծումները:
Առաջին դեպքում հաղթող է ճանաչվել Galaxy Note 9-ը, որն իր բոլոր չափանիշերով գերազանցել է մյուս սմարթֆոններին:
Այս դասակարգում մասնագետները դրական գնահատականի են արժանացրել նաև HTC U12+, Samsung Galaxy S9+, LG G7, Huawei Mate 20 Pro և Sony Xperia XZ3 սմարթֆոնները:
Մյուս դասակարգմամբ գնահատվել են այն սմարթֆոնները, որոնք օգտագործում են արհեստական ինտելեկտը՝ ավելի որակյալ լուսանկարներ ստանալու համար: Այստեղ բացարձակ առաջատարը Google Pixel 3-ն էր:
Այս սմարթֆոնին չափորոշիչներով մոտ են եղել Huawei P20 Pro, Huawei Mate 20 Pro, Xiaomi Mi A2, LG V40 և Vivo Nex սմարթֆոնների տեսախցիկները:
Լավագույն գինը
Լավագույն սմարթֆոնը գին-որակ հարաբերակցությամբ ճանաչվել է Pocophone F1-ը՝ Xiaomi-ից: Այն արժի մոտավորապես 300 դոլար:
Նշվել է նաև մոտ 550 դոլար արժողությամբ OnePlus 6T սմարթֆոնը, որը իր գնի համեմատ առաջարկում է շատ մրցակցային պարամետրեր և ժամանակակից դիզայն:
Սիրարփի Աղաբաբյան
